DILI, STLTIMORLESTE.com – Daudaun nee stok aimoruk ba moras Raiva nian iha Instituto Nacional de Farmácia e Produtos Médicos (INFPM) iha atu halo atendimentu.
Nia dehan, kona ba moras Raiva nia stok aimoruk iha armazen INFPM sei sufisiente hela para Sentru Saude no Postu Saudu inklui Hospital Referal sira halo atendimentu.
“Ita iha stok 135 ba var, no ring iha 265 neebe mak agora daudaun iha ita armazen. Agora ita halo akizisaun ba UNICEF nee ita hatoo ona porvolta 10 mill ba Rig ho 15 mill ba iha Var, neebe tempu badak sei haruka mai para responde ba moras sira nee,” hatete Diretor Kompras Instituto Nacional de Farmácia e Produtos Médicos (INFPM), Sergio Belo ba jornalista sira iha nia knaar fatin INFPM Kampung Alor Dili, Kuarta (10/06/2026).
Nia esplka, konaba stok aimoruk ba moras Raiva nee iha munisípiu stok la iha nee, nia dehan atu iha ka laiha importante mak komunikasaun, se stok kuandu mamuk ona, no iha INFPM laiha ona mak foin dehan laiha, mais stok iha hela nee lalebe dehan laiha.
“Ita koalia kona ba nia lokalizasaun nee, Raiva nee barak liu nee iha batas, hanesan Suai, Bobonaro, Oekusse, entaun pedidu husi sira nee mak barak. Foin daudaun ita haree tan kazu Raiva ida akontese iha Munisípiu Baukau, kona feto ida, kazu foun mak ida nee. Normalmente kazu Raiva iha batas nee barak, tanba tama liu-liu batas. Neebe pedidu husi munisípiu tolu nee mak barak, Covalima, Bobonaro ho Oekusse, nomos inklui pedidu husi Hospital Rejional Baukau,” nia deklara.
Iha fatin hanesan, Diretor Armazenamentu INFPM, Boas Alves Barreto informa, pedidu kona ba stok aimoruk ba moras Raiva nee depende ba sira neebe kaer programa SNAEM, tanba pedidu nee liu husi sira, SNAEM halo tiha aprovasaun mak foin tama iha nee, hafoin INFPM halo atendementu ba sira.
Nia afirma, durante pedidu tama barak nee sira parte programa SNAEM bele esplika kona ba ida nee. Tanba iha 13 Munisípiu nee iha programa nee tenke liu husi programa SNAEM.
(jen)
