DILI, STLTIMORLESTE.com – Instituto Ciência Saude (ICS) submete ona proposta subvensaun públika 2026 ba Ministeriu Ensinu Superior Siensia no Kultura (MESSK), subvensaun refere sei fo apoiu dosentes, estudantes liu husi peskiza no formasaun ba lingua português.
“Ami nian proposta subvensaun nee ami hatama tiha ona ba Ministériu Ensinu Superior Siensia no Kultura, ami hatama dezde iha semana rua liu ba, nee duni agora ami submete tiha ona proposta nee ba MESSK, kona-ba resposta nee depende ba MESSK, montante osan nee US$ 49.624, nee subvensaun ba tinan 2026 nian,” Afirma Reitor Instituto Ciensia Saude (ICS), Leao Borges ba jornalista STL iha nia knaar fatin, Tersa nee (31/03/2026).
Nia dehan, subvensaun ida nee uza sei apoiu dosentes, estudantes sira, tanba nee proposta subvensaun nee ICS submete ona ba Ministériu Ensinu Superior, tanba tinan nee ICS hetan subvensaun husi MESSK.
“Subvensaun nee atu bele fo apoiu dosentes peskiza no formasaun ba lingua português, hadia laboratoriu, tanba nee ami uza subvensaun nee tuir nesesidade Institutu nian neebe mak ohin hau mensiona,” nia haktuir.
Iha fatin seluk, Reitor ISC, Sebastião Pereira hatete, kona-ba uza subvensaun tau prioridade ba saida, nee sei hein lai karta husi ministériu, ho nunee hafoin bele hatene, subvensaun nee sei tau prioridade ba saida, nee duni governu liu husi MESSK apoiu subvensaun ida nee ba ensinu superior sira iha rai laran.
“Tinan ida nee ami hetan suvbensaun públika, maibe ami seidauk halo proposta no ami seidauk simu karta husi MESSK, maibe ami hetan subvensaun públika, tanba nee hein karta husi MESSK para ami bele halo proposta ba Ministeriu refere, nee duni depois mak ami nia ema ba foti karta ida nee,” katak nia.
Entretantu Reitor East Timor Coffee Institute ( ETCI), Mateus Maia de Jesus antes nee dehan, iha tinan 2025, East Timor Coffee Institute ( ETCI) la hetan subvensaun públiku, tanba hetan transformasaun.
“Hau hanoin kona-ba subvensaun, ami nian relatóriu hatama iha loron 15 Janeiru tinan 2025, maibe ida nee subvensaun neebe mak ami hetan husi MESSK iha tinan 2024 ninia, nee ami hatama ratoriu tuir kalendariu ministeriu nian. Ami iha 2025 la hetan subvensaun públika husi MESSK, tanba hetan transformasaun, tanba nee ba tinan 2025 ami la hetan subvensaun,” nia dehan.
(jac)
