DILI, STLTIMORLESTE.com – Ministra Saude (MS), Elia Amaral dos Reis Amaral hatete, importansia husi susubeen inan mak atu fo nutritivu neebe mak saudavel. Susubeen inan laos deit fo impaktu pozitivu ba oan sira maibe mos ba inan sira.
Liafuan nee Ministra hatete ba jornalista sira iha serimonia forum nasional ba susubeen inan iha TL 2026 ho tema ‘Susubeen inan investimentu diak ba jerasaun saudavel” iha Novo Turizmu, Sesta (07/]8/2026).
Nia katak, susubeen inan nian mak hanaran kolestrum neebe mak iha vitamina kompletu. Susubeen inan laos deit fo impaktu pozitivu ba oan sira maibe mos ba inan sira, atu nunee bele mos iha redusaun ba moras kankru nian, atu nunee bele iha prevensaun mais sedu.
“Ita hatene katak susuben inan nian mak kompletu ho vitamina nomos bele fo impaktu positivu ba iha kresimentu fisik no mental nian, atu nunee nia bele sai bebe neebe saudavel no jerasaun neebe matenek,” dehan nia.
Governante nee agradese ba inan sira neebe fo susuben ba bebe, tanba TL sei tama hela iha indikador neebe mak dehan 56% ba leten, signifika katak tuir hela standar indikador neebe iha, oinsa atu hadia diak liutan no fortifika liutan atu nunee bele tun husi standar nee no presiza aumenta liutan, atu nunee ita bele haree ba iha impaktu positivu ba susuben inan nian. Iha TL hahu tiha ona komersializasaun ba susuben formula nee rasik.
Nia parte husu ba inan sira no suporta mos husi aman no familia atu fo susuben esklusivu hahu husi bebe moris mai ba fulan 6 too tinan 2, atu nunee bele produtividade nomos fo impaktu positivu ba iha bebe nia kresimentu nomos aban bainrua bele redus ba iha mortalidade infantil. Futuru TL depende ba saúde no kapasidade jerasaun foun.
Nunee mos Diretora Jeral Kuidadu Saude Primaria, Elizabeth Leto Mau liu husi diskursu hatete, fiar katak susubeen inan laos deit responsabilidade husi seitor saude maibe responsabilidade hamutuk husi governu, empregadores, familia, komunidade, parseriu desenvolvimentu no sosiedade tomak. Tanba nee presiza lideransa forte, politika neebe efetivu no sistema apoiu neebe sustentavel atu garante katak inan hotu fo susuben ba sira nia oan hahu husi oras ida dahuluk bebe moris too fulan 6 no sei kontinua fo susu too tinan 2 ou liu.
Nia hatutan, objetivu prinsipal husi forum nasional ida nee mak atu haforsa komprimisiu politika institusional husi Ministeriu relevante, setor privadu, parseriu desenvolvimentu no soaiedade sivil atu implementa politika lejislasaun no sistema apoiu ba susuben inan. Habelar koordenasaun intersektorial no asegura katak ambiente servisu komunidade no fasilidade saude hodi apoiu efetivu ba inisiu susuben seluk. Susubeen esklusivu durante fulan 6 no kontinua fo susuben inan to tinan 2 ou liu. Hametin intervensaun politik nasional, dekretu lei no padraun nasional sira. Komprimisiu governu no orientasaun internasional. Hamosu rekomendasaun husi parte relevante identidade sira atu hametin no haforsa servisu sustentavel ba susuben inan no oan.
(dom)
