DILI, STLTIMORLESTE.com – Eis Prezidente Republika (PR), Taur Matan Ruak husu ba veteranu hotu-hotu atu trata dokumentu hodi hetan pensaun, tanba nee osan estadu nian.
Lia hirak nee Eis PR, Taur hatoo relasiona ho politika IX Governu Konstitusinal liu husi Ministeriu Asuntu Kombatentes Libertasaun Nasional ( MACLN), neebe trata dokumentu ba dadus veteranu sira nian, balu hetan oportunidade no seluk laiha.
“Ita haree tuir dadus veteranu neebe Governu fo, katak rezistensia neebe uluk halo funu, inklina aan iha funu, nia grau tun, no ida neebe mak la halo funu nia grau boot fali, no sira neebe uluk halo funu lakohi simu sira nia direitu, tanba nee husu ba veteranu sira hotu katak, hadia hotu imi nia dokumentu hodi asesu ba pensaun, tanba nee orsamentu estadu nian,” dehan Eis Prezidente Republika, Taur Matan Ruak liu husi nia aprezentasaun iha Farol, Dili, Kuarta (29/01/2025).
Veteranu tuir Eis Prezidente Republika nee katak, sira neebe husi grau 0a3 la hetan pensaun, 4a7 hetan pensaun dala ida deit, maibe 8a4, 15a19 no 19a24 nee hetan pensaun kada fulan, tanba nee sira neebe veteranu Timoroan hotu neebe inklina iha nivel 4a7 too 19a24 atu trata imi nia dokumentu ho los hodi simu pensaun, karik seidauk diak ba halo reklamasaun, tanba Governu fo toleransia loron nenulu (60) hodi reklama.
Tanba orsamentu neebe Governu uza hodi selu ba veteranu sira nee osan estadu nian, tanba nee nuudar veteranu hadia imi nia dokumentu, ho asesu ba rekonhesimentu kondekorasaun ka pensaun nian.
“Ita kuandu lakohi atu simu ita nian direitu ba pensaun, ita mak lakon, tanba ita kuandu mate, futuru dezrekonhese husi Estadu, tanba nee fo hatene ba malu, hadia dadus hodi hetan imi nia direitu, tanba veteranu sira neebe rejistu iha tinan 2009 kuandu lakohi simu mak sei hetan prejudikadu nafatin,” nia sublina.
Nia dehan, veteranu sira neebe rejistu iha tinan 2003 hetan pensaun kuaze tinan sanulu resin nee (16) ona, no rejistu iha 2009 sei iha hela problema, tanba nee veteranu ka veterana sira trata dokumentu los hodi hadia dadus atu hetan direitu husi Estadu Timor Leste.
“Hau apelu ba maluk veteranu iha territoriu nasional, hotu-hotu hadia dadus, hadia dokumentu asesu pensaun, no tenke foku ba oinsa buka solusaun diak ba direitu tomak hanesan veteranu ida, labele buka problema hasoru Governu, tanba sei la rezolve problema sira neebe enfrenta,” katak nia.
Aleinde nee Ministru Asuntu Kombatentes Libertasaun Nasional (MACLN), Ministru Gil da Costa Monteiro “Oan Soru” husu ba veteranu sira iha territoriu nasional tomak katak, naran balu no grau neebe la tuir dokumentu ruma, Governu tolera loron 60 atu halo reklamasaun, bainhira laiha satisfasaun ho lista edital tinan 2009 nian.
Tanba veternu sira neebe la satisfaz ho lista dijital 2009, Governu anunsia ona, presiza duni halo reklamasaun ka kontestante hodi hatama tuir Konselhu Kombatentes Libertasaun Nasional sira iha Postu Administrativu ka munisipiu idak-idak nian.
“Ita nia regra ka lei klaru ona, tanba nee la autoriza ema idak-idak husi ema 92.591 atu idak-idak lori ninian mai hatama, lei autoriza. Nunee husu atu hatama liu husi organizasaun,” nia sublina.
Nia dehan, husi dadus neebe rejista iha tinan 2009 hamutuk 124.782, hafoin liu husi prosesu verifikasaun, dadus identifikadu hamutuk 92.591 tuir dijital neebe taka sai ona iha loron 15 fulan Janeiru tinan 2025.
Husi numeru veteranu nee ema nain 14 mak ho grau 20/24, sira neebe 15/19 hamutuk 186, ema neebe 8/14 hamutuk 9.375, sira neebe laiha kapasidade servisu 359, Martires iha 22.252, Prestasaun Pekuniaria Uniku nain 23.560, sira neebe menus husi tinan 3 nain 35.281, sira neebe Naun Kombatente total nain 1.574 lista veteranu sira nee mak sai husi lista dijital neebe fo sai ba publiku.
Entretantu Veteranu Lino da Costa afirma, dalan uniku mak maluk veteranu sira tenke halo reklamasaun ba naran ka grau balu neebe seidauk los bele ba hadia, nunee bele hetan rekonhesimentu ka kondekorasaun ou pensaun husi estadu Timor Leste.
Tanba luta neebe durante 24 nee la fasil, ema barak mak oferese nia aan, tanba hakarak ukun rasik aan, agora lista dijital neebe Governu fo sai, la tuir ona saida mak ema nee halo durante iha tempu invazaun nia laran, nunee husu ba maluk veteranu ka veterana sira atu bele halo reklamasaun tuir regra no lei neebe vigora.
(EST 1)
