DILI, STLTIMORLESTE.com – Telkomcel realiza refleksaun hamutuk ho membru no entidade oin-oin, hodi hahi no agradese ba Maromak ba grasa neebe Nai haraik ba idak-idak.
Refleksaun nee halao iha salaun Muntizu Bebora ho topiku “No esperansa la bosok basa Maromak nia domin nakfakar tiha ita nia fuan sira liu husi espiritu santu neebe haraik mai ita,” no refleksaun nee partisipa husi Lideransa Telkomcel hamutuk ho padre, Madre, inklui mos entidade oin-oin hamutuk hodi hahi ba Maromak ba nia Grasa no domin neebe suli ba ema idak-idak.
Iha biban nee, Embaixador Indonezia ba Timor Leste, Okto Durinus Manik liu husi nia diskursu iha salaun Multiuzu Bebora Kinta kalan (06/02/2025) hatoo agradese ba Maromak ba nia grasa no domin neebe suli ba ema idak-idak hodi halibur hamutuk iha fatin nee hodi selebra refleksaun neebe organiza husi Telkomcel.
“Eventu ida nee importante tebes oinsa mak atu haforsa tan ita nia fiar, no penharapan hotu ba Jesus Kristu, tanba nee apresia ba CEO pak Hardy ho membru telkomcel hotu neebe la sente kolen hodi realiza eventu nee nomos atividade sira halo kada loron, tanba nee mai ita basa liman ba telkomcel,” katak Embaixador.
Tanba nee husu hotu-hotu loke fuan hahi no hanoin ba Maromak hodi haksolok no haklaken Nai nia liafuan sira ba povu no ba rai doben ida nee.
Nunee mos CEO Telkomcel, Benedictus Ardiyanto Priyo hatoo agradese ba Maromak ba nia domin no nia grasa mak halo hodi halibur hamutuk iha kalan nee hodi realiza refleksaun ho topiku “No esperansa la bosok basa Maromak nia domin nakfakar tiha ita nia fuan sira liu husi espiritu santu neebe haraik mai ita”.
CEO mos hatoo agradese ba partisipante hotu-hotu neebe mak ho laran luak hatan ba konvite husi Telkomcel nia mai hamutuk hodi halo refleksaun no hahi ba Maromak hamutuk iha fatin nee.
“Agradase ba Maromak tanba ohin kalan nee ita bele hamutuk atu selebra domin husi Kristu nia liu husi atividade refleksaun hamutuk,” katak CEO Telkomcel.
Nia mos informa ba partisipante hotu katak, atividade fiar nia iha telkomcel nee atividade rutin iha Telkomcel, tanba kada loron Kinta sempre halo refleksaun lee biblia, tanba lee Biblia nee hanesan hahan ida ba sira kada loron ho grasa Maromak mak sira bele halao atividade hotu ba oin.
(eme)
