DILI, STLTIMORLESTE.com — Tribunal Judisiál Primeira Instánsia Dili (TJPID) iha Segunda, 7 Setembru 2026, hala’o prosesu primeiru interrogatóriu ba arguidu ho inisiál JdN, ne’ebé Ministériu Públiku akuzadu ho krime rua.
JdN lori mai iha tribunal tanba alegasaun komete krime tentativa omisídiu no arma branka, depois lori katana no tenta ta vítima ida iha Suku Poetete, Postu Administrativu Ermera Vila, Munisípiu Ermera.
Iha sala audiénsia, Juíza turnu Jumiati Freitas rona deklarasaun arguidu no, hafoin remata, husu Ministériu Públiku no parte defeza atu tama ba alegasaun.
Iha alegasaun, Ministériu Públiku husu tribunal atu aplika medida prizaun preventiva ba arguidu.
Maibé, parte defeza la konkorda ho pedidu Ministériu Públiku no husu tribunal atu aplika medida aprezentasaun periódika.
Hafoin rona alegasaun husi parte rua, tribunal, liuhusi Juíza turnu Jumiati Freitas, deside aplika medida aprezentasaun periódika ba arguidu.
Tuir desizaun tribunal, JdN tenke aprezenta an iha eskadra polísia ne’ebé besik ho nia rezidénsia dala ida kada semana, durante prosesu investigasaun ne’ebé sei lao hela.
Tuir kronolojia kazu, insidente akontese iha loron 4 Setembru 2026, iha Suku Poetete, Munisípiu Ermera. Kazu ne’e akontese tanba disputa kona-ba baliza rai, ne’ebé hamosu dezentendimentu entre parte sira.
Hafoin dezentendimentu ne’e, arguidu uza katana no ta vítima iha parte rentos, hodi halo vítima hetan kanek.
Prosesu ne’e prezide husi Juíza turnu Jumiati Freitas. Ministériu Públiku reprezenta husi prokuradora ida, enkuantu arguidu hetan asisténsia jurídika husi advogadu privadu ida.
(ter)
