MANATUTO, STLTIMORLESTE.com – Governu Timor-Leste hatuur fali Navíu Patrulla Betano ba tasi iha Doka Behau, Manatutu, hodi hametin soberania marítima nasionál.
Ministru Defeza, Kontra-Almirante Donaciano da Costa Gomes ‘Pedro Klamar Fuik’, lidera serimónia ne’e iha Doka Behau, Munisípiu Manatutu, Tersa-feira (27/10/2026).
Ministru Defeza afirma katak, Navíu Patrulla Betano nia fila-fali ba tasi marka etapa importante iha esforsu Governu nian atu hametin prezensa nasionál iha área marítima.
“Ohin la’ós de’it loron serimónia ida. Ohin ita rekupera fali ita-nia dignidade. Ró patrulla Betano fila fali ba tasi, hamutuk ho Jaco,” dehan ministru.
Nia subliña katak, navíu patrulla Betano no Jaco la’ós de’it ekipamentu militár, maibé reprezenta determinasaun povu Timor-Leste nian atu proteje soberania marítima.
Tuir ministru, navíu rua ne’e iha ona tinan 15, maibé falta atensaun, manutensaun no desizaun pendente afeta sira-nia kondisaun operasionál.
Situasaun ne’e, nia dehan, halo Timor-Leste kuaze lakon prezensa iha nia área marítima, tanba navíu rua ne’e la konsege hala’o knaar ho efetivu.
“Ho vizaun estratéjika no sentidu soberania, Governu deside fó fali vida ba ró rua ne’e. Ne’e la’ós de’it desizaun téknika,” nia afirma.
Ministru Defeza esplika katak, desizaun Governu nian atu hadi’a navíu rua ne’e iha dimensaun polítika, morál no istórika ba soberania nasionál.
Nia enfatiza katak, Timor-Leste presiza hametin vijilánsia marítima, liuliu iha tasi sira ne’ebé tama iha jurisdisaun nasionál.
Iha oportunidade ne’e, ministru hato’o rekoñesimentu ba engenheiru, tékniku, mariñeiru, ofisiál no parseiru nasionál no internasionál sira ne’ebé kontribui ba manutensaun navíu rua ne’e.
Nia mós husu mariñeiru sira atu asegura navíu patrulla Betano no Jaco nafatin iha kondisaun di’ak, operasionál no prontu atu hala’o misaun.
“Ró rua ne’e la’ós de’it patrimóniu Estadu nian. Sira reprezenta soberania nasionál iha tasi. Imi tenke mantein sira iha kondisaun di’ak,” nia dehan.
Aleinde ne’e, ministru, hodi reprezenta IX Governu Konstitusionál, hato’o agradesimentu ba autoridade lokál no komunidade Behau ne’ebé kolabora durante prosesu manutensaun navíu rua ne’e.
Nia rekoñese katak, komunidade Behau suporta movimentu ema, ekipamentu, barullu no atividade servisu durante períodu manutensaun iha Doka Behau.
“Komunidade Behau nia sakrifísiu la’ós buat ki’ik. Ne’e sakrifísiu nonook ida ne’ebé povu Behau oferese ba kauza soberania ita-nian,” nia deklara.
Serimónia ne’e hetan partisipasaun husi Komandante Komponente Navál no nia estrutura, xefia Ministériu Defeza, Segundu Komandante PNTL, Bombeirus, autoridade sivíl no militár sira.
(jen)
