BAUKAU, STLTIMORLESTE.com – Durante tinan 20 ona familia hein restu mortais saudozu Vicente Reis “Sahe” ho nia espoza saudoza Wewe iha rezidensia Bukoli, Postu Administrativu Baukau Vila, Munisipiu Baukau.
Durante observasaun iha loron 04 Junhu tinan nee iha terenu nota, saudozu Sahe ho nia espoza saudoza Wewe daudaun kontinua asegura iha rezidensia uma familia Bukoli, tanba seidauk haloot.
No sauzodu nia ruin tau ona iha fatin neebe falun ho bandeira FRETILIN akompanha husi Bandeira FALINTIL no Bandeira Nasional RDTL asegura iha fatin neebe familia prepara iha Bukoli.
“Sauzodu hau nia alin, hau mak hein ba ema seluk sentimentu oinsa, ema nee mate bolu saudozu nasaun Timor nian, ema la hein hau nia bin mak hein, nee hau triste ga la triste hau entrega ba Autoridade sira,” hatete Terezinha dos Reis ba jornalista STL iha nia rezidensia Bukoli, Kuarta (04/06/2025).
Saudozu nia bin nee espresa ho sentimentu triste, tanba saudozu Sahe Estadu Timor Leste konsidera Martire ba funu Libertasaun Nasional, maibe hahalok solidariedade la hatudu tuir lia murak husi FRETILIN hateten “A prática em critéria da verdade” tanba pratika durante tinan 20 hasoru restu mortais saudozu nian familia seidauk haree.
Terezinha katak, pozisaun FRETILIN durante tinan 20 parte familia dezvontade atu koalia sai.
“Nee hau eskorega kedas ona,” Terezinha hateten hasoru pozisaun partidu FRETILIN durante tinan 20 ba kotuk.
Terezinha preokupa kondisaun real, tanba tinan naruk ona neebe seidauk iha solusaun ruma ba saudozu no saudoza nia restu mortais, sorte ruin nunee la fo impaktu ba saude publiku, maibe isin oras nee fo impaktu ba saude.
Mezmu nunee, maibe agradese tanba hanesan Autoridade Suku Bukoli entrega ona rai liu hektare rua iha Bukoli ba Autoridade Munisipiu Baukau no Konselhu Kombatentes Libertasaun Nasional atu konstrui monumentu ba saudozu no saudoza.
“Preparasaun nee dezde tinan kotuk Konselhu Suku, Veteranus no Autoridade Munisipiu Baukau ami tuur hamutuk ona kona-ba funebre nian, too agora nia serimonia iha hela veteranus nia liman,” katak Terezinha dos Reis.
Nia katak, hanesan mos Autoridade Suku Bukoli husu Konselhu Kombatentes Libertasaun Nasional no Autoridade Munisipiu Baukau atu aselera prosesu, tanba prosesu hotu entrega ona ba Autoridade Munisipiu Baukau no Konselhu Kombatentes Libertasaun Nasional.
(tom)
