DILI, STLTIMORLESTE.com – Visi Ministru Asuntu Parlamentar, Aderito Hugo da Costa dehan, preokupa kona-ba titulu arguidu no Termu Indentidade Rezidensia (TIR) neebe Komisaun Anti Korrupsaun (KAK) no Ministeriu Publiku fo, tanba dala barak lori too tinan naruk nia laran.
Haktuir Visi Ministru Asuntu Parlamentar, Aderito Hugo da Costa ba jornalista sira, bainhira hatoo nia diskursu iha Aniversariu KAK iha Farol, Sesta (21/02/2025).
“KAK tau titulu arguidu, maibe titulu arguidu nee hela tinan barak mos iha sira nia pasta laran, tanba prosesu kleur. Ministeriu Publiku mos tau titulu TIR ba akuzadu sira tinan barak nia laran,” dehan nia.
Nia hatete, seidauk mai iha KAK ba ona iha Ministeriu Publiku, no leba TIR durante tinan 5, no ikus mai hateten dadus la sufisiente atu julga. Tinan 5 leba TIR, no notifikasaun neebe haruka ba iha eventu politiku, laba iha eventu normal.
Iha fatin hanesan, Komisariu KAK Rui Pereira dehan, kodigu prosesu penal foun atu konstitui ema ida sai hanesan arguidu tenke iha provas.
“Ita iha kodigu prosesu penal foun konstitui ema ida sai arguidu tenke iha provas, konstitui arguidu nia advogadu ka defeza tenke iha nia sorin hodi akompanha fo asistensia atu kumpri ba lei neebe iha,” dehan nia.
Nia hatutan, kona-ba TIR prosesu investigasaun neebe KAK konstitui arguidu, durante investigasaun iha KAK nian fatin TIR sei iha kuandu investigasaun nee sei kontinua, se konklui ona entrega ba iha Ministeriu Publiku mak produs ona, laos KAK.
Durante prosesu investigasaun konstitui nuudar arguidu sei iha KAK, kuandu KAK konklui ona dokumentus final estatutu arguidu entrega ona ba iha Prokurador, sira mak iha kompetensia atu produs TIR ba arguidu neebe mak nia kazu entrega ona ba iha neeba.
Aleinde nee Prokurador Jeral Republika, Alfonso Lopez afirma, kuandu keixa ruma tama, dala ruma falha husi ofisial no Prokurador sira, tenke hato ba iha Konselhu.
“Kuandu sente prejudika, falha husi ita nia Prokurador no ofisial balu tenke hatoo ba iha Konselhu, tanba Konselhu mak orgaun jestaun disiplina atu haree falha iha neebe erru ka disiplina,” dehan nia.
Nia afirma tan, liu tiha prazu, prova arguidu nia liberdade, lo-loos nee nia tenke liberta kedan. Kuandu liu tiha prazu nafatin, la iha krimi ida habeas korpus tenke keixa, tanba kuandu keixa iha Prokurador turnu, rejista avalia.
(ter)
