DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Konselhu Ministru aprova rezolusaun ho donativu ba Republika Demokratika São Tome e Príncipe ho valor rihun US$ 500, tanba nasaun kiak.
Xefe Governu hatoo kestaun nee ba jornalista sira, bainhira remata halo enkontru ho Prezidente Republika iha Palasiu Prezidensial Nicolau Lobato, Bairo Pite, Dili, Kinta (13/03/2025).
“Doasaun apoiu ba São Tome e Príncipe, ita hatene São Tome e Príncipe rai kiik oan ida no furak liu, maibe laiha kbiit neebe ita fo apoiu tiha ona tanba sira mak kaer hela Prezidensia CPLP, foin daudaun sira halo iha Marsu fo apoiu oituan mais nasaun CPLP ba hotu iha neeba parese sira iha atividade ruma karik, tanba nee mak Primeiru Ministru mai husu apoiu ita fo,” katak Primeiru Ministru.
Timor Leste apoiu ba donativu ba Republika Demokratika São Tome e Príncipe tanba nasaun kiak, se apoiu ba Angola nasaun neebe riku nee mak labele.
Nia dehan, São Tome e Príncipe rai ida rua rai kiik maibe furak loos, tanba nee mak Primeiru Ministru lori aifunan husi São Tome mai kuda iha Balibar, maibe kleur ona la haree, tanba nee moris ka mate la hatene.
Iha loron kuarta Konselhu Ministrus aprova projetu Rezolusaun Governu, neebe aprezenta husi Primeiru Ministru, Kay Rala Xanana Gusmão, relasiona ho donativu ba Republika Demokratika São Tome e Príncipe ho valor rihun US$ 500, hodi apoia kustus neebe mosu, tanba Prezidensia Rotativa CPLP.
Aleinde nee Konselhu Ministru halao sorumutu iha Palasiu Governu, Dili, no aprova projetu Rezolusaun Governu, neebe aprezenta husi Ministru Negosius Estranjeiru no Kooperasaun, Bendito dos Santos Freitas ba Kontribuisaun neebe atribui ba Fundu Voluntariu Sistema Koordenador Rezidente Nasoins Unidas nian, ho valor dolar amerikanu rihun atus rua.
Kontribuisaun ida nee reforsa kompromisu Timor Leste ba reforma sistema dezenvolvimentu Nasoins Unidas nian, neebe promove husi Sekretariu Jeral ONU, no ba implementasaun ajenda tinan 2030 ba Dezenvolvimentu Sustentavel.
Fundu Voluntariu Sistema Koordenador Rezidente nian nee nuudar mekanizmu finanseiru ida neebe estabelese hodi apoia no hametin funsaun koordenasaun ba atividade Dezenvolvimentu Nasoins Unidas nian iha Estadus membrus, hodi asegura efisiensia, transparensia no inkluzaun neebe boot liu iha inisiativa dezenvolvimentu.
(eme)
