DILI, STLTIMORLESTE.com – Eis Ministru Negósiu Estranjeiru Indonézia, Marty Natalegawa konsidera Timor Leste (TL) nia aseitasaun nu’udár membru Association of Southeast Asian Nations (ASEAN) ho ninia nomeasaun nu’udár Prezidente ASEAN iha tinan 2029 sei sai nu’udár testemunha ida bá konfiansa nasaun Sudeste Aziátiku nian kona-bá kapasidade lideransa iha nível rejionál.
Marty Natalegawa hato’o konsiderasaun ne’e bainhira akompaña hosi Eis-Ministru Negósiu Estranjeiru Indonézia, Hassan Wirajuda hala’o enkontru ho Primeiru Ministru (PM), Kay Rala Xanana Gusmão iha Palásiu Governu, Tersa (19/05/2026).
Diplomata Indonéziu ne’e observa katak, Timor-Leste hatudu ona progresu signifikativu iha tinan 24 nia laran dezde restaurasaun independénsia, maske tempu ne’e sei badak tebes. Progresu ne’ebé TL atinje la’ós de’it progresu fíziku, maibé mós kreximentu ekonómiku ne’ebé iha papél importante iha rejiaun.
“Timor Leste nasaun ida ne’ebé hakmatek, estável. Indonézia agradese tanba iha viziñu ida ne’ebé amigável tebes,” hatete Marty Natalegawa liu husi nota komunikadu Imprensa neebe STL asesu husi media GPM.
Iha fatin hanesan, Embaixadór Timor Leste bá Indonézia, Roberto Sarmento de Oliveira Soares konsidera vizita ne’e halo parte iha esforsu atu hametin relasaun amizade entre nasaun rua nian.
Eis Governante Indonézia na’in-rua ne’e mós simu kondekorasaun hosi Estadu Timor Leste iha ámbitu Komemorasaun Restauasaun Independénsia Timor Leste nian bá dala-24, tanba konsidera sira-nia kontribuisaun hodi hametin relasaun entre Indonézia ho Timor Leste.
Raden Mohammad Marty Muliana Natalegawa nu’udár diplomata Indonézia no nu’udár Ministru Negósiu Estranjeiru iha Gabinete Indonézia Unidu Da-ruak.
Noer Hassan Wirajuda mak polítiku Indonézia ida ne’ebé nu’udár Ministru Negósiu Estranjeiru Indonézia nian hosi tinan 2001 to’o 2009. Nia hala’o knaar durante prezidénsia sira hosi Megawati Sukarnoputri no Susilo Bambang Yudhoyono.
Akompaña iha vizita ne’e Xefe Reprezentante Embaixada Indonézia iha Timor Leste, Nugroho Yuwono Aribhimo.
(alb)
