DILI, STLTIMORLESTE.com – Timor Leste (TL) ho nasaun 4 husi Comunidades dos Países da Língua Portuguesa (CPLP) hanesan Angola, Brazil, Moçambique, Portugal no Timor Leste sei promove Língua Português iha Indonezia.
Lia hirak nee hatoo husi Embaixador Timor Leste ba Indonezia, Roberto Soares ba jornalista sira, bainhira remata halao enkontru ho Prezidente Republika, Jose Ramos Horta iha Palasiu Prezidensial Nicolau Lobato, Bairo Pite, Dili, Segunda (10/03/2025).
Embaixador nee hatete, nasaun membru CPLP sei selebra loron 5 de Maio, hanesan mundial lian Português iha Indonezia, tanba lian ofisial português hanesan kultura nasaun CPLP nian.
“Ami mos foin lalais nee hasoru malu hodi fo ona hanoin ba malu, oinsa mak atu bele promove halo divulgasaun ba Língua Portuguesa iha Indonezia. Nunee mos promove kultura CPLP ninian, fiar katak liu husi atividade sira hanesan nee bele promove diak liu tan lian português iha mundu,” dehan Embaixador Roberto.
Embaixador dehan, iha selebrasaun loron 5 de Maio, hanesan mundial lian português iha Indonezia sira mos sei promove kultura CPLP nia, nunee mos nuudar Timoroan neebe pertense ba iha CPLP sei kontribui promove lingua português iha nasaun seluk.
“Ita nuudar Timor neebe pertense ba komunidade Língua Portuguesa hola parte, hodi kontribui lian ofisial português, aumezmu tempu promove ita nia kultura neebe mak parte integral ba komunidade neebe ita bolu dehan CPLP,” dehan nia.
Nia dehan, atividade nee anualmente sempre selebra, maibe iha tinan ida nee Timor Leste sei hamutuk ho nasaun membru CPLP haat seluk, hodi selebra loron língua português nee iha Indonezia.
Nia haktuir tan katak, ida nee atividade ida neebe anual iha Timor Leste mos halo, hodi selebra 5 de Maio, loron mundial lingua português ninian, felizmente iha Jakarta iha mos embaixador sira neebe mai husi nasaun CPLP hamutuk iha Jakarta, iha nasaun lima mak hanesan Agola, Brazíl, Moçambique, Portugal no Timor Leste.
(eme)
