DÍLI, STLTIMORLESTE.com — Seleksaun futebol Sub-15 Timor-Leste (TL) remata faze grupu FIFA U-15 World Cup & Festival 2026 iha Azerbaijão ho derrota lima husi jogu lima, ne’ebé halo ekipa nasional ne’e hetan pontu zero iha Grupo AF.
Kompetisaun ne’e hala’o iha Baku, Azerbaijão, husi 24 to’o 30 Outubru 2026, ho Timor-Leste hasoru seleksaun Azerbaijão, Haiti, Andorra, Austrália no Israel.
Iha jogu dahuluk, loron 24 Outubru, Timor-Leste lakon 0–6 ba Azerbaijão. Iha jogu daruak, loron 25 Outubru, Timor-Leste lakon tan 0–6 ba Haiti.
Iha jogu datoluk, Timor-Leste lakon 0–3 ba Andorra. Iha jogu dahaat, seleksaun nasional ne’e lakon 1–11 ba Austrália. Iha jogu ikus fase grupu, Timor-Leste lakon 1–2 ba Israel.
Ho rezultadu hirak ne’e, Timor-Leste remata iha pozisaun sexta, ho pontu zero, golu rua mak hatama no golu 28 simu. Rezultadu ne’e hatudu katak seleksaun Sub-15 Timor-Leste sei presiza hadi’a organizasaun defensiva, komunikasaun entre jogadór sira no aproveitamentu oportunidade atu marka golu.
Maski hetan rezultadu ne’ebé difísil, partisipasaun iha kompetisaun internasionál ne’e bele sai esperiénsia importante ba jogadór joven sira atu aprende kona-ba intensidade jogu, disciplina tátika no preparasaun hasoru seleksaun husi nasaun seluk.
Timor-Leste sei iha jogu tan
Timor-Leste la elimina husi kompetisaun maski remata iha pozisaun ikus Grupo AF. Bazeia ba regulamentu torneiu nian, ekipa sira fahe ba nivel kompetisaun ne’ebé hanaran Tier A to’o Tier F, tuir klasifikasaun iha fase grupu.
Tanba ne’e, Timor-Leste tama Tier F no sei kontinua disputa jogu iha faze tuirmai, ne’ebé hala’o husi 28 to’o 30 Outubru 2026. Nune’e, seleksaun nasional sei iha oportunidade atu kontinua buka vitória no aumenta esperiénsia internasionál.
Ba treinador no jogadór sira, rezultadu iha fase grupu bele sai hanorin importante atu halo avaliasaun kona-ba ekipamentu, estratéjia, kondisaun fízika no kapasidade atu responde ba presaun durante jogu.
Objetivu tuirmai mak aproveita jogu sira iha Tier F atu hadi’a prestasaun no buka rezultadu di’ak liu, hodi lori esperiénsia útil ba dezenvolvimentu futeból Timor-Leste iha futuru.
(leo)
