DILI, STLTIMORLESTE.com – Timor Leste (TL) ho Vietnam avansa iha espansaun telekomunikasaun iha Forum Futuru ASEAN 2025.
Prezidente Republika, Jose Ramos Horta hasoru malu ho CEO husi Grupu Viettel, Nguyen Thi Hoa (Hana), iha Hotel Melia iha Hanoi, hodi avansa kolaborasaun ba espansaun husi infraestrutura telekomunikasaun nian iha Timor Leste, partikularmente liu husi subsidiariu Viettel nian, Telemor.
Tuir komunikadu neebe STL asesu Kinta (27/02/2025) enkontru neebe partisipa husi Ministru Negosiu Estranjeiru no Kooperasaun Timor Leste, Bendito dos Santos Freitas, halao durante Forum Futuru ASEAN ba dala 2 (25-26 Fevereiru), hodi destaka parseria rejional sira ba progresu teknolojiku.
Prezidente Ramos Horta destaka telekomunikasaun nuudar pilar estratejiku ida ba kresimentu ekonomiku no modernizasaun, elojia Telemor nia knaar hodi hadia konetividade no inkluzaun dijital dezde ninia lansamentu iha tinan 2012.
Durante konversa sira, CEO Nguyen anunsia kompromisu Viettel nian hodi atualiza rede Timor Leste nian husi 4G ba 5G, hodi promete hadia kualidade no oportunidade sira ba setor ekonomiku, edukasional no sosial.
Ramos Horta reafirma kompromisu husi Governu hodi promove investimentu no inovasaun estranjeiru, konsidera Viettel hanesan “parseiru xave” hodi demokratiza asesu ba servisu sira telekomunikasaun nian.
CEO destaka Telemor nia legadu tinan 12 iha Timor Leste, alina ho Viettel Global nia prezensa iha nasaun 11, no promete atu kontinua investe iha infraestrutura dijital.
Delegasaun Timor Leste, inklui embaixador João Pereira, destaka importansia husi enkontru iha hametin relasaun bilateral sira. Telemor, hetan lisensa iha Timor Leste dezde fulan-Agostu 2012, maka dudu modernizasaun husi telekomunikasaun sira, ho lansamentu husi 5G marka faze foun ida hodi taka divizaun dijital nasaun nian no apoia vizaun koletiva ASEAN nian ba futuru ida neeebe orientadu husi teknolojia.
(eme)
