DILI, STLTIMORLESTE.com — Prezidente Tribunal Rekursu, Afonso Carmona hateten katak, Tribunal Rekursu (TR) prevee orsamentu hamutuk US$ 4 miliaun ba konstrusaun edifísiu Tribunal Judisiál Primeira Instánsia iha munisípiu neen.
PTR Afonso Carmona hatete, Tribunal Rekursu hatuur ona fatuk dahuluk ba konstrusaun futuru edifísiu Tribunal Judisiál Primeira Instánsia iha Munisípiu Vikeke. Enkuantu konstrusaun tribunal iha Baucau, Ermera no Bobonaro sei hahú iha tempu badak, no Suai no Oe-Cusse mos tama iha planu.
“Husi konstrusaun sira ne’e, ba kada Tribunal Judisiál Primeira Instánsia iha munisípiu neen, ita prevee miliaun US$ 4,” dehan Prezidente Tribunal Rekursu, Afonso Carmona ba jornalista sira iha Tasi-Tolu, Segunda, 7 Setembru 2026.
Nia hateten katak, iha tinan oin, Tribunal Rekursu sei kontinua fó atensaun ba konstrusaun Tribunal Judisiál Primeira Instánsia iha munisípiu lima ne’ebé seidauk iha edifísiu tribunal rasik.
Tuir nia, bazeia ba Lei Organizasaun Judisiál, tenke estabelese Tribunal Judisiál Primeira Instánsia iha munisípiu hotu. Timor-Leste iha munisípiu 13, no Tribunal Judisiál Primeira Instánsia iha Dili estabelese ona.
Nia hatutan katak konstrusaun tribunal sira ne’e tama iha programa Governu, no servisu konstrusaun balun hahú ona ho serimónia hatuur fatuk dahuluk.
Iha sorin seluk, akademiku Universidade Nasionál Timor Lorosa’e (UNTL), Rafael de Jesus, konsidera tempu ona atu lori tribunal besik liu ba komunidade.
“Hau hanoin tempu to’o ona atu lori tribunal hakbesik ba komunidade sira, atu sira bele sente katak justisa iha duni ba sira,” dehan Rafael de Jesus.
Nia hatutan katak estudante barak remata ona estudu iha área Direitu. Tanba ne’e, sentru formasaun tenke kontinua kria planu atu investe rekursu umanu ba sistema tribunal iha Timor-Leste.
(ter)
