DILI, STLTIMORLESTE.com – Sekretariu Jeral Partidu FRETILIN, Mari Alkatiri hatete, transfere pasiente Timoroan ba Atambua nee laos atu rezolve problema, importante investe iha area saude iha Timor Leste (TL).
Mari hatete, Timor Leste tenke tane nia dignidade rasik, tanba nee diak liu investe iha area saude iha nasional, nunee bele halo tratamentu ba pasiente sira, laos husi nasaun ida transfere fali pasiente ba iha kabupaten NTT.
“Foin lalais mak vizita HNGV iha semana kotuk, laos transfere ba kabupaten ida mak rezolve problema, primeiru ita nia problema iha nasional, ita tenke hatene atu investe iha ita nia area saude ho dignidade mos, segundu ita hakarak dezenvolve Kabupaten Belu ka Timor Leste, nee laos emerjensia, hau haree deit boot sira nee aban bainrua la ba ona Singapura, Malazia, ba deit Atambua, se mak atu ba uluk,” dehan Sekretariu Jeral Partidu FRETILIN, Mari Alkatiri ba jornalista sira iha konferensia imprensa neebe halao iha nia knaar fatin Farol, Dili, Kuarta (12/03/2025).
Nia hatutan, uluk nia dezenvolve Oekusi sai sidade ema hotu hatete katak Timor mos bele ona, maibe sente moe bainhira iha nivel nasional labele rezolve problema saude oinsa halo tratamentu ba pasiente sira.
“Hau laos kontra, hau kontente tanba Atambua dezenvolve sira nia rai, mais uluk hau kuandu ba Oekusi sira dehan ita mos bele, agora sira hateke ba Oekusi ita mos bele mais anivel nasional ita labele, ida nee mak halo ita moe,” katak Eis PM nee.
Iha fatin seluk, Prezidente Republika, Jose Ramos Horta hatete, oras nee daudaun Governu mos servisu makaas oinsa mak atu dezenvolve setor saude maibe karik iha fasilidade balu neebe mak seidauk kompletu no balu avaria mak labele halo tratamentu ba pasiente sira diak liu transfere ba iha Atambua hodi halo tratamentu, tanba besik no ladun gastu osan.
Prezidente Republika, Jose Ramos Horta dehan, Hospital Atambua besik rabat los Maliana Fronteira, familia balu iha Atambua mos husi Timoroan barak, tanba nee laiha problema se bainhira halo tratamentu iha Atambua, tanba nee karik iha pasiente balu sofre ba moras rins mak labele halo tratamentu tanba fasilidade avaria bele transfere lalais ba Atambua tanba besik.
Entretantu Primeiru Ministru, Kay Rala Xanana Gusmão mos deklara ona katak, foin lalais Prezidente Republika vizita ba hospital ida iha Atambua haree kondisaun neebe diak, tanba nee sei koalia ho Ministra Saude nunee bele transfere pasiente balu neebe labele kura ba Atambua hodi halo tratamentu, tanba besik no ladun gastu osan, duke ba Singapura, Malazia ho kustu boot.
(eme)
