DILI, STLTIMORLESTE.com – Tribunal Distrital Dili aplika ona Prizaun Preventiva ba arguidu ho insial JdA neebe mak envolve iha kazu tráfiku umanu, hodi halo rekrutamentu ilegal ba Timor oan sira.
“Ita detein hafoin ita aprezenta ba Tribunal, ita mos hetan Delegasaun Kompetensia ka mandadu tolu (3) husi Tribunal hanesan semana kotuk hau relata ona, Mandadu Buska, Aprensaun no Detensaun ba suspeitu sira neebe indikasaun forte involve iha laran hafoin aprezenta, Tribunal hatun kedas Prizaun Preventiva ba autor nain 2 seluk halo kompleta ba ida neebe mak ba ona,” hatete Porta Voz Komando Polisia Nasional Timor Leste (PNTL), Superintendente Polísia João Belo dos Reis ba jornalista sira liu husi Konferensia Imprensa iha Komando Jeral PNTL Kaikoli, Dili, Kuarta nee (11/06/2025).
Nia tenik, kona-ba kazu trafiku umanu neebe mak Diresaun Servisu Investigasaun Kriminal (DSIK) prosesa iha semana kotuk katak, husi autor inisial neebe ita identifika.
“Husi oportunidade nee, hau hakarak apela ba komunidade sira hotu katak kazu trafiku umanu nee laos hanesan ita ida koalia, kazu trafiku umanu nee akontese ba se deit, husi labarik to’o katuas ferik, idade neebe deit, indikasaun tanba saida mak Polísia iha intervensaun ba kazu ida nee, primeiru suspeitu sira neebe mak organiza, rekruta no lori sai/transporta ita nia sidadaun nain 14 nee laiha lisensa ba iha rekrutamentu trabalhador nian,” nia esplika.
Nia informa, segundu sira nia kompanhia lisensa ba produz Bilhete Aviaun nian, laos produz bilhete ba ema atu ba servisu iha estranjeiru, terseiru nasaun Slovakia nee laiha koordenasaun ho ita no ita nia ema ida mak la hatene kona-ba rekrutamentu.
“Ita tauk, ita suspeita, ita nia sidadaun sira nee atu lori ba Centro Scamming iha Mianmar, tanba nee ita halo intervensaun hodi prevene ita nia sidadaun sira sai vitima ba iha kazu bosok, burla no mos kazu Tráfiku Orgaun isin lolon nian iha Kambodia no nasaun seluk neebe durante nee kazu barak ona hasoru sidadaun Indonezia, Filipina no nasaun seluk tan,” nia koalia.
Nia deklara, wainhira Polísia halo intervensaun ba iha suspeitu inisial primeiru, ita identifika katak pasaporte lubuk ida mak nia rekolha tiha ona, ida nee deit indikasaun ba tráfiku umanu iha ona. Segundu laiha kontratu, terseiru nia laiha lisensa husi Governu ba iha rekrutamentu trabalhador estranjeiru nian.
“Entaun ita halo intervensaun, ita aprezenta ba Tribunal. Agora kompetensia Tribunal nian, desizaun atu oinsa nee Tribunal mak haree,” katak nia.
Nunee, iha konferensia imprensa nee vitima nain 15 nee lamenta tebes ho parte migrasaun tahan sira nia dokumentus pasaporte too agora la fo, maske sira ba husu fila-fali. Enkuantu polisia tahan dokumentus sira nia, tanba deskonfia no identifika iha indisiu trafiku umanu.
Maibe vitima nain 15 nee rekuza katak, sira laos vitima ba trafiku umanu, maibe sira rasik mak hakarak ba servisu iha nasaun Slovakia, nunee sira husik atu fo livre ba suspeitu nain tolu nee, tanba nuudar mos vitima.
Aleinde, vitima nain 15 mos konsidera Polisia Migrasaun halo identifikasaun ba no prende dokumentus nee la los, tanba sira rezeita katak, sira laos vitima ba trafiku umanu.
(jen)
