DILI, STLTIMORLESTE.com – Tribunal Judisial primera Instansia Dili halao julgamentu ba arguidu ho inisial LCA, tanba komete krimi hasoru lezadu ho inisial DCR.
Tuir akuzasaun neebe Juiz prosesu Jose Escurial lee sai iha loron Kinta katak, iha loron 16 fulan Junhu 2018, iha festa hodi selebra graduasaun iha KS nia uma iha Metinaru.
Iha oras tuku 02:00 madrugada, derrepente ema deskonhesidu tuda KS nia uma rezulta vidru sira rahun hotu.
Banhira ema sira halai sai hotu husi uma laran hodi haree ema sira tuda uma nee, arguidu LCA hahu dudu lezadu DCR nia motorizada marka Beat ba dook tiha hafoin hodi besi kanu baku rahun lezadu nia motorizada.
Lezadu nia motorizada sosa tutan husi SCR ho valor la apuradu maibe kalkula katak superior husi US$ 1.000,00.
Konsekuensia husi arguidu nia hahalok nee, rezulta lezadu nia motorizada hetan estragus no la aprovadu.
Motivu husi problema nee lezadu rasik la hatene.
Tanba nee, Ministeriu Publiku akuza arguidu komete krime Danu Agravadu neebe previstu iha artigu 259 husi Kodigu Penal.
Hatan ba akuzasaun nee, arguidu konfesa imparsial ba faktus, no arguidu deklara atu hadia fila fali motor nee.
Lezadu mos haforsa tan akuzasaun katak, arguidu estragus lezadu nia motor, maibe motivu tanba saida lezadu la hatene.
Rona tiha arguidu no lezadu, iha alegasaun Prokurador Domingos Barreto husu arguidu atu hadia fali motor neebe halo estragus, se arguidu la hadia Prokurador husu Tribunal atu fo pena alternativu ba arguidu.
Enkuantu defeza iha alegasaun husu absolvisaun ba arguidu, tanba arguidu promete sei hadia motor neebe halo estragus.
Rona tiha parte rua, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Afonso Carmona, Fransisca Cabral, Jose Escurial, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensor Publiku, Nelson Borges.
(ter)
