DILI, STLTIMORLESTE.com – Prezidente Tribunál Rekursu, Afonso Carmona hato’o katak, funsionamentu Tribunál Movél hala’o nafatin iha Tribunál Judisiál Primeira Instánsia Dili, Suai, Baukau no Oe-Cusse.
“Ha’u dehan beibeik, Tribunál Movél ne’e tanba hakbesik justisa ba povu. Atividade ne’e la’o nafatin,” dehan Carmona ba Jornalista sira iha Kaikoli, Kinta (10/09/2026).
Esplika katak, juíz sira ne’ebé preside julgamentu movél depende ba ajenda kazu. Bainhira iha kazu ne’ebé presiza julgamentu, juíz sira sei ba hala’o julgamentu iha lokal ne’ebá.
Nia informa, Tribunál Rekursu autoriza juíz sira atu lori no julga kazu ho númeru mínimu hamutuk 11 ka liután, tanba sira sei hela iha lokal durante semana ida.
“Semana ida iha ne’ebá ne’e imposivél ó lori prosesu ida ka rua de’it. Juíz ne’ebé mak halo julgamentu movél bele preside kazu sira singulár no kolektivu. Julgamentu Movél iha Tribunál haat ne’e funsiona nafatin hotu,” nia dehan.
Iha fatin ketak, Juíz Administradór Tribunál Judisiál Primeira Instánsia Dili, Yudi Pamukas, deklara katak julgamentu movél hala’o nafatin.
“Julgamentu Movél la’o hela hanesan parte ida husi apoiu atu hamenus kazu pendente ne’ebé iha,” dehan Yudi Pamukas.
Nia hatutan katak iha prosesu sira ne’ebé julga liuhusi julgamentu movél, balu juíz sira deside kedas, no balu bele lori fila mai Dili atu halo desizaun. Maibé, desizaun final depende ba juíz ne’ebé responsavel ba prosesu ida-idak.
Alende ne’e, Akademiku UNTL, Rafael de Jesus, dehan julgamentu movél importante tebes tanba lori justisa hakbesik ba komunidade.
Tanba ne’e, nia konsidera julgamentu movél presiza kontinua atu apoia esforsu hamenus kazu pendente no lori servisu justisa hakbesik liután ba komunidade sira.
(ter)
