LAUTÉM, STLTIMORLESTE.com – Transporte diariu iha Postu Administrativu Lospalos, Tum-Tum sai transporte publiku ba komunidade sira, bainhira asesu atividade iha merkadu no servisu sira seluk.
“Ita konsidera Tum-Tum sai transporte publiku neebe sempre halo movimentasaun iha Postu Administrativu Lospalos, hodi tula pasajeiru sira hanesan funsionariu publiku, negosiante no estudante sira, bainhira asesu ba eskola, servisu no merkadu ,” dehan pasajeiru, Adolfo dos Santos ba STL iha Lospalos Vila, Sesta (10/01/2025).
Tuir nia, durante nee transporte viariu hanesan mikrolete no taxi, tantu mini-truck la halai tula pasajeiru sira, tanba Tum-Tum mak sempre halo movimentasaun iha vila laran hodi tula komunidade ka funsionariu no negosiante sira ba halao idak-idak nia servisu.
Tanba konsidera katak transporte Tum-Tum iha Lospalos Vila mak sai transporte publiku no diariu ba iha Lospalos, sempre tula komunidade sira, neebe balu ba servisu iha instituisaun publiku no balu ba faan sasan iha merkadu.
Iha sorin seluk, Kondutor Tum-Tum, Avelino Ribeiro dehan, iha Lospalos Vila trasporte hanesan Tum-Tum sai trasporte viariu ba komunidade sira iha Lospalos, tanba kada loron-loron sempre halo movimentasaun hodi tula pasajeiru sira, liu-liu ema sira neebe ba servisu no asesu merkadu sira.
Trasporte Tum-Tum iha Lospalos Vila 100 ba leten, entaun konsidera katak transporte sira mak sai hanesan transporte publiku ba komunidade sira iha Lospalos Vila, tanba kada loron sempre tula estudante sira atu ba eskola.
Aleinde nee husi Diresaun Nasional Transporte Terrestre (DNTT), iha Munisipiu Lautem, Edi Korrea Lemos hateten, transporte Tum-Tum sai transporte publiku iha Lospalos Vila, tanba nee husu katak Tum-Tum ho roda tolu neebe uja estrada publiku tula pasajeiru sira iha kapital Munisipiu Lautém, atu rejista hodi kompleta dokumentu ho imediata, tanba ba oin aplikasaun regras nee sei vigor, oinsa bele seguru no disiplinadu.
Tanba Tum-Tum sira neebe sirkula iha Lospalos Vila tenki iha konsiensia hodi kumpri regras neebe estadu hatun ona liu husi rejistu, hafoin hetan lisensa sirkulasaun iha estrada publiku iha Munisipiu Lautem, transporte hotu-hotu la livre husi lisensa sirkulasaun nian.
(EST 1)
