BAUKAU, STLTIMORLESTE.com – Uma kain hamutuk 168 iha Suku Makalaku, Postu Administrativu Kelikai, Munisipiu Baukau, seidauk asesu bee moos no eletrisidade.
Informasaun nee hatoo husi Xefe Suku Makalaku, Estevao Salamao Martins Belo ba jornalista sira iha Makalaku, Kinta (05/12/2024).
“Populasaun neebe seidauk asesu hamutuk 168 husi Aldeia Bosilai, Defadae no Makalira,” nia informa.
Nia sublina, husi uma kain refere husi Aldeia Makalira uma kain 7, Defadae 25, enkuantu Aldeia Bosilai 76.
Entretantu bee moos iha tempu bailoron komunidade sira lao distansia kilometru 1 ho balun hafoin asesu ba bee moos, maibe tempu udan, iha udan been neebe komunidade aproveita hodi utiliza ba nesesidade.
Enkuantu kona-ba eletrisidade, tuir informasaun neebe Autoridade Suku nee asesu katak, iha kompanhia lokal balun asina ona kontratu ho parte relevante iha loron 02 Dezembru nee, neebe sei halo instalasaun eletrisidade ba uma kain sira iha Suku refere.
Nunee mos, Prezidente Autoridade Munisipiu Baukau, Veneranda Lemos husu Autoridade Suku atu konfirma nafatin kompanhia neebe manan ona projetu eletrisidade iha suku refere, nunee bele aselera instalasaun iha tempu badak, tanba tinan naruk ona komunidade hein naroman husi lina eletrika.
(EST 2)
