DILI, STLTIMORLESTE.com – UNESCO- UNICEF komemora loron Internasional Lian Inan ba dala 25.
Iha loron Sesta (21/02/2025) UNESCO no UNICEF reafirma hamutuk sira nia kompromisu atu promove diversidade linguístika no integra lian.inan sira iha sistema edukasaun Timor Leste. Tinan ida nee selebrasaun sira destaka papel krítiku edukasaun lian oin-oin nian hodi haburas inkluzaun, hadia rezultadu aprendizajen sira, no prezerva patrimoniu kultural. Iha nasaun ida neebe koalia lian lokal liu 20 hamutuk ho lian ofisial sira.
Tetun no portugués, labarik barak hasoru barreira signifikativa atu aprende. Liu 70% husi labarik sira iha Timor Leste tama eskola la ho fluensia iha lian ofisiál sira nee, dala barak sira luta atu komprende lisaun sira no fo impaktu ba sira nia abilidade atu hetan susesu iha eskola.
Diretora Eskritóriu Rejionál UNESCO, Maki Katsuno Hayashikawa sublinha, vizaun luan liu kona-ba edukasaun lian oin-oin.
“Lian sira mak odamatan ida ba aprendizajen, kultura no identidade. Hamutuk ita bele harii futuru ida diak, lian laos barreira ida, maibe ponte ida ba konhesimentu, identidade no unidade,” nia hatete.
Nunee mos reprezentante UNICEF, Patrizia Digiovanni dehan, sira garante labarik iha oportunidade atu aprende lian neebe sira komprende.
“Hodi investe ba lian oin-oin iha edukasaun, ami garante katak labarik idak-idak iha oportunidade atu aprende iha lian ida neebe sira komprende, hodi kria sistema edukasaun ida neebe inkluzivu no ekuitativu liu”, dehan Patrizia.
UNESCO no UNICEF bolu ema sira neebe halo polítika, edukadór sira no komunidade sira atu fo apoiu ba edukasaun lian oin-oin, dezenvolve polítika inkluzivu, investe iha rekursu aprendizajen no formasaun profesores sira, no prezerva patrimóniu linguístiku riku Timor Leste nian liu husi edukasaun no inisiativa kultural, hodi hakuak diversidade linguístika, Timor Leste harii futuru ida iha neebe labarik idak-idak bele buras, la haree ba lian neebe sira koalia.
(eme)
