DILI, STLTIMORLESTE.com – Fundu Nasoins Unidas ba Labarik (UNICEF) ohin entrega ekipamentu Teknolojia, Informasaun, Komunikasaun (TIK) ho valor US$ 198,430 ba Ministeriu Edukasaun (ME), hodi apoia esforsu atual sira haforsa utilizasaun TIK iha prosesu ensinu no aprendizajen iha Timor Leste.
Tuir Komunikadu neebe STL asesu husi media UNICEF, Tersa nee (17/12/2024) hatete, doasaun neebe sei kontribui atu hasae rezultadu aprendizajen husi estudante sira iha nasaun nee, inklui doasaun laptop 32, televizaun 31, tableta 300, jerador 30 no projektor 32.
Ekipamentu sira nee sei fahe ba eskola Ensinu baziku 30 iha Ainaro, Ermera no Likisa, neebe benefísia too estudante 17,469 (rihun sanulu-resin hitu, atus haat neen-nulu resin sia), 90 joven sira neebe para eskola no 659 profesor.
Doasaun ekipamentu TIK nee iha signifikadu laos deit seremonia entrega rekursu sira nee hanesan investimentu ida iha futuru
“Ita-nia esforsu hamutuk hodi sai hanesan ponte ba divizaun dijital, empodera manorin sira, no fo inspirasaun ba estudante sira atu sai diak liutan iha mundu neebe mak avansadu ho literasia dijital no inovasaun no espera ida-nee sei ajuda hasae prosesu ensinu no aprendizajen neebe sei rezulta iha rezultadu aprendijazen estudante sira nian,” hateten Ministra Edukasaun, Dulce de Jesus Soares.
Iha tinan 2021, durante tempu surtu Covid-19, rezulta taka eskola sira hotu hanesan medida ida atu kontrola virus nee, ida-nee rezulta Ministeriu Edukasaun introdus plataforma dijital oin-oin hodi apoia kontinuidade ensinu no aprendizajen.
Plataforma eskola ba uma Eskola Goes Home, hanesan plataforma ida neebe dezenvolve durante surtu Covid-19, no neebe hatudu potensia boot husi plataforma dijital sira atu fornese ho efetivu materiál ensinu no aprendizajen ba profesor no estudante sira. Plataforma sira nee uza programa televizaun no radiu, livru eletroniku, plataforma pasaporte aprendizajen atu asegura kontinuidade aprendizajen iha uma.
Maske nunee, mudansa ida nee ba aprendizajen remote hatudu divizaun dijital boot iha Timor Leste, tanba labarik barak inklui labarik sira neebe mai husi antesedente disvantajen, lakon tiha ona prosesu aprendizajen. Iha area rural barak, asesu ba ekipamentu TIK inklui telemovel no komputador sira sei limitadu nafatin.
Aleinde nee, area rural sira iha Timor-Leste la sempre iha konetividade internet no eletrisidade neebe reliavel.
Ekipamentu TIK neebe entrega ona ba Ministeriu Edukasaun, sei ajuda atu responde ba tempu introdusaun TIK neebe la hanesan iha sistema edukasaun iha Timor Leste.
“Ita moris iha tempu dizital nia laran, iha neebe fasil atu hasae estudante sira-nia aprendizajen no dezenvolvimentu abilidade liu hosi plataforma no aplikasaun dizital sira. Iha mundu tomak, teknolojia sira ajuda atu troka estudante sira-nia esperiensia aprendizajen, liu husi permite estudante sira aprende husi fatin naran deit sira iha ba, fo asesu fasil ba rekursu aprendizajen, no fo oportunidade ba sira atu liga ho sira-nia kolega sira iha mundu tomak,” dehan Patrizia Di Giovanni, Reprezentante UNICEF.
UNICEF kontente atu kontribui ba esforsu sira atu hametin sistema edukasaun no kria oportunidade foun ba labarik sira atu sai boot no hetan susesu.
Aleinde ekipamentu TIK nian, profesor sira iha eskola sira neebe benefisia sei halao workshop hasae kapasidade hodi ajuda sira hasae sira-nia abilidade no kompetensia atu uza no hanorin uza ekipamentu sira nee.
(eme)
