DILI, STLTIMORLESTE.com – Eskola Ensinu Baziku Sentral (EBC – sigla português) Fatumeta halao ona enkontru ho inan aman estudantes, hodi koalia kona-ba uniforme eskola, no daudaun nee hein inan aman lori osan ba eskola para bele suku ona farda.
“Kona-ba uniforme eskola nian, iha Sabadu foin daudaun ami halao ona enkontru ho inan aman estudantes, tanba bazeia ba sirkulasaun neebe Ministeriu Edukasaun katak, eskola bele halao enkontru ho inan aman atu nunee inan aman sira bele servisu hamutuk ho eskola, nunee eskola bele pesan farda, hodi inan aman sira bele sosa farda oan sira, nee duni hein inan aman sira lori osan mai para selu farda nee, osan nee kompletu tiha mak ita foin pesan farda nee,” dehan Diretor EBC Fatumeta, Cornelio Sequeira dos Santos ba jornalista STL iha nia knaar fatin Fatumeta, Kuarta nee (14/05/2025).
Nia dehan, enkontru ho inan aman hotu ona iha Sabadu semana kotuk nee, iha enkontru laiha inan aman mak kestiona kona-ba uniforme nee, tanba sira konkorda sosa farda nee, tanba ida nee diak ba oan sira no inan aman sira hakarak tenke iha duni farda ba sira nia oan, eskola ida tenke iha duni farda, nee duni inan aman sira aseita lori osan mai para suku farda nee.
“Ninia kustu ba farda nee mak hanesan kaos ho kalsa nee hamutuk US$ 11, farda nasional nee US$ 14, tanba husi ME fo hatene katak labele husu osan liu US$ 25, agora ami buka meus ba kompanhia neebe bele servisu hamutuk ho ami,” dehan nia.
Iha sorin seluk, Koordenador Pre Eskolar Moris foun I, Domingas Beatriz da Cunha dehan, kona-ba farda eskola nee mak too agora tenke hatene husi Edukasaun hatur lo-loos katak, farda mak ida nee no farda nee mai husi neebe, husi eskola ka inan aman sira mak prepara.
“Nee duni ita tenke bazeia ba iha buat ruma, ami enkontru ho inan aman nee tinan ida dala tolu ou dala haat, ami mesak labele foti desizaun mesak kona-ba farda nee,” dehan nia.
Nunee mos Joanita Maia hanesan inan husi estudantes hatete, nuudar inan aman hein deit informasaun husi eskola katak, tenke uniforme, tanba kada loron labarik sira mai iha eskola la uza farda, uza ropa baibain deit, iha balun mak uza farda anterior husi eskola seluk.
“Nuudar inan aman ami hein deit informasaun husi eskola, katak tenke uniforme, tanba kada loron labarik sira mai iha eskola la uza farda, uza ropa baibain deit, iha balun mak uza farda anterior husi eskola seluk,” katak nia.
(jac)
