DÍLI, STLTIMORLESTE.com – Urna restu mortais preladus nain haat depois misa sei translada husi Tasi Tolu ba Katedral Dili hodi kontinua serimonia funebre.
Komisaun Konjunta entre Governu no Igreja Katólika informa katak prosesu transladasaun restu mortais preladus nain haat sei halao iha loron 10 Setembru 2026, husi Tasi-Tolu ba Igreja Nossa Senhora Imaculada da Conceição, Katedral Dili.
Informasaun nee hatoo husi Vise-Koordenadór Komisaun Organizadora, Padre Guilhermino da Silva, iha konferénsia imprensa iha Tasi Tolu, Tersa (8/09/2026).
Santa Misa no aktu ofisiál sei hahú tuku 17.00 iha Esplanada Tasi-Tolu. Selebrasaun Misa sei prezide husi Sua Eminénsia Kardeál Dom Virgílio do Carmo da Silva, SDB, Arsebispu Díli no Prezidente Konferénsia Episkopal Timorense (CET), hamutuk ho Bispu Dioseze Maliana no Baucau, relijiozu no relijioza sira.
Preladus nain haat ne’ebé sei translada mak Dom Jaime Garcia Goulart, Dom José Joaquim Ribeiro, Monsenhor Martinho da Costa Lopes no Dom Alberto Ricardo da Silva.
Hafoin Misa, sei iha aktu ofisiál, inklui leitura despaxu agradesimentu no diskursu husi Pro Prezidente Conferensia Espiscopal Timorense (CET ) Monsenor Marche Smezcar no Prezidente Repúblika.
Depois de serimónia misa iha Tasi-Tolu, urna restu mortais sira sei lori liu husi konvoi ba Katedral Dili, nuudar fatin deskansa ikus.
Konvoi sei hakat liu husi Rotunda Nicolau Lobato, Komoro, Fatuhada, Kampung Alor, Aitarak-Laran no rua Colmera, antes to’o iha Katedral Dili.
Padre haktuir, iha Katedral, paroquianu sei simu urna sira ho tradisaun kultura Timor iha portaun igreja, antes lori ba área protokolár no tama ba laran igreja.
Serimónia fúnebre sei kontinua to’o remata, no sei iha kontinénsia militár ho salva.
Komisaun informa katak estrada iha rota konvoi sei taka temporariamente husi tuku 17.00 too serimónia fúnebre remata iha Katedral Dili.
Sira neebe sei tama iha linha konvoi mak Bispu sira, órgaun soberania Estadu no konvidadu sira ne’ebé hetan autorizasaun.
Ba sarani neebe partisipa misa iha Tasi-Tolu, komisaun husu atu la tuir konvoi ba Katedral, tanba kapasidade fatin limitadu, tanba nee sarani bele akompaña serimónia Funebre iha Katedral liu husi transmisaun direta RTTL no GMN TV.
Komisaun mos husu ba média sira seluk atu uza link ka output transmisaun ofisiál RTTL no GMN TV hodi fahe serimónia ba públiku iha Timor-Leste no rai-liur.
Komisaun Konjunta Governu no Igreja Katólika apela ba públiku, liuliu komunidade sarani sira iha Díli, atu fó kooperasaun no apoiu tomak, hodi garante prosesu transladasaun no serimónia fúnebre lao ho dignidade, dame no hakmatek.
(joa)
