DILI, STLTIMORLESTE.com – Funsionariu sira utiliza sala Patrimoniu Estadu, hanesan lori karreta estadu hodi treinu oan, ida nee viola pratika prinsipiu boa Governasaun no abuzu poder, tanba nee Komisaun Anti Korupasaun (KAK) presiza halao investigasaun.
Kestaun nee hatoo husi Visi Diretor HAK, Antonino de Limas ba jornalista sira iha nia knaar fatin, Farol, Sesta nee (06/02/2025).
Nia hatete, KAK nomos PDHJ presiza halo kontrola ba aktu indisplinar ka aktu sira neebe mak kontra regulamentu ba funsionariu hotu-hotu, nunee sira bele kumpri no haree aktu sira neebe viola prinsipiu boa governasaun. Kona-ba uza sala karreta estadu nee patrimoniu estadu, tanba nee KAK ho PDHJ presiza nafatin halo kontrola haree ba asuntu nee bele mos haree no kontrola aktu indisplinar neebe mak funsionariu sira halo uza patrimonia estadu la tuir nia dalan, ida nee presiza halo investigasaun.
“Presiza halo investigasaun ba funsionariu neebe mak hatudu indisplinar, tenke foti medidas, nunee ema seluk mos labele kontinua halo aktu neebe kontra ou viola boa governasaun nia, karik utiliza karreta estadu sala nee abuzu poder, hau hanoin KAK bele halo investigasaun no PDHJ mos tenke haree asuntu nee ho didiak, tanba nee aktu neebe viola pratika prinsipiu boa Governasaun, ida seluk nee abuzu poder,” katak nia.
Nunee mos Peskizador AJAR, Inocencio Xavier hatutan, politika ida mosu tanba lao sala, tanba nee mak VIII Governu Konstitusional hamosu politika ida hodi fo deit subsidiu ba funsionariu sira, nunee evita uza patrimoniu estadu fora husi servisu, foin daudaun orgaun tribunal neebe hatene lei diak, maibe uza fali karreta estadu ba treinu nia oan idade kiik, Governu anterior uza regulariza ida nee katak karreta labele para iha uma, maibe IX Governu tama kontinua fo karreta ba sira, entau diak liu osan subsidiu labele fo.
“Se fo subsidiu ba sira entaun karreta labele fo, karreta tenke utiliza ba operasaun servisu diaria atendimentu publiku, laos uza pasiar tun sae, nee gasta osan neebe fo hanoin ba Governante sira, ita nia osan fundu minarai laiha ona,” katak nia.
Nia hatete, Governu ida agora gasta osan taka matan deit, saida mak Governu nee hakarak ba Timor nia sutentavel, devia Governu anterior halo diak governu agora halo tuir, nia dehan nia koalia hanesan nee laos nia FRETILIN ka PLP, maibe nia koalia ba intrese povu no nasaun nia.
“Dala ida tan se mak preokupa Governasaun nee o nia maluk laos o nia opozisaun, tanba dala barak ita nia Governante sira, ita nia lider sira haree protestu sira nee alergia fali,” katak nia.
Tanba nee mak nia husu KAK no PDHJ hodi konrola, se KAK la haree no PDHJ la haree diak liu taka, duke haree instituisaun barak la funsiona nee gasta osan deit.
Aleinde nee Parlamentu Nasional (PN) liu husi Bankada Partidu FRETILIN kestiona autor judisial balu neebe utiliza karreta estadu ho sapa matrikula TDD fo treinu ba nia oan iha Tasi Tolu neebe oras nee viral tebes iha media sosial Facebook.
(eme)
