DILI, STLTIMORLESTE.com – Estudantes balun husi Eskola Sekundariu Jeral 10 de Dezembru Komoro hetan valor la diak iha ezame primeiru periodu, tanba nee eskola sei bolu inan aman bele klarifik.
Diretor Eskola Sekundariu Jeral 10 de Dezembru Komoro, Manuel Verdial dehan, estudantes neebe valor la diak nee, husi parte eskola nian sei bolu inan aman estudantes sira para bele fo klafika, katak iha uma sira nian oan estuda ka lae, maibe tanba dala ruma sira la uza tempu nee didiak.
“Ita nian estudantes balun, tanba saida mak valor la diak iha ezame, nee duni ami sei bolu inan aman estudantes sira atu bele koalia ho Inan aman, atu dehan tanba saida ita boot sira nian oan nee mai, nee sempre nunee hela deit, tanba nee ita bele nota labarik sira nee neineik ba beibeik ita bele hatene lo-loos katak, labarik sira nian hakarak lo-loos nee saida,” Manuel ba STL iha nia knaar fatin, Segunda nee (20/04/2026).
Tuir Manuel, estudantes sira nee dala ruma sira dehan moras, maibe durante nee sira la lori karta ruma atu justifika sira nia moras nee laiha, fo razaun ida nee too semana ida atu ezame nee sira mai, nee sira nia inan aman hatene ida nee ka lae, dala ruma eskola fo karta ba, estudantes nee fo ninia inan aman ou lae.
“Ami bolu inan aman sira nee mai iha eskola para koalia kona-ba asuntu hirak nee, atu nunee inan aman ho eskola nee bele servisu hamutuk ho diak, tanba ita nian estudantes sira tenke hakas aan estuda, tanba sira mak futuru ba rai ida nee, nee duni sai jerasaun neebe diak, presiza hakas aan estuda,” nia informa.
Nunee mos Julio de Jesus Maia Gomes nuudar estudante husi ESJ 10 de Dezembru Komoro katak, nuudar estudante bainhira atu hetan valor neebe mak diak husi ezame, primeiru estuda, tanba mai eskola nee atu aprende no simu materia husi profesores ba kada disiplina idak-idak, nee duni oinsa atu aproveita tempu nee ho didiak.
“Hau nuudar estudante bainhira atu hetan valor neebe mak diak husi ezame, primeiru estuda, tanba mai eskola nee atu aprende no simu materia husi profesores ba kada disiplina idak-idak, nee duni oinsa atu aproveita tempu nee ho didiak,” tenik nia.
(jac)
