BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos konsidera, nuu fuan ida bele reforsa ekonomia iha rai laran liu-liu iha Munisipiu Baukau.
Veneranda aprezenta, durante Timor ukun aan sasan sira hanesan vaju aifunan, sinelus, pasta, tapetes, sapeu, tali no adubu depedensia deit husi rai liu, tanba rekonhese seidauk iha kretividade, maibe daudaun nee iha ona joven balu husi Munisipiu Lautem, Vikeke inklui Baukau neebe bele transforma nuu fuan ida ba produtu oin oin.
“Entaun ita dehan ho deit nuu kulit produsaun sai buat barak no nuu fuan ida bele produs buat lubuk ida, tanba nuu fuan ida halo ba kadeia de valor bele reforsa ita nia ekonomia rai laran,” hateten Veneranda ba STL iha Vila Nova Baukau, Sesta (17/04/2026) hafoin remata ensera iha atividade treinamentu ida kona-ba transforma nuu kulit sai produtu modernu neebe realiza husi Asosiasaun Emprezarial Mulheres Timor Leste (AEMTL) no ILO iha Sentru Dezenvolvimentu Komunitariu Suku Triloka, Postu Administrativu Baukau Vila.
Nia esplika, husi nuu fuan ida bele reforsa ekonomia iha rai laran liu-liu iha Munisipiu Baukau, tanba husi nuu fuan ida nia isin tranforma ba mina tein no nuu fuan nia kulit bele transforma ba sapeu, sinelus, pasta, vaju aifunan, tapetes, tali, inklui adubu organiku neebe bele diversifika produtu oin oin iha rai laran.
Nia sublina, programa produsaun refere AEMTL mak nuudar nain no hetan apoiu husi ILO, tanba nee husu atu foku ba prosesamentu, nunee ikus bele iha rezultadu hodi Munisipiu Baukau tenke iha brand ida.
“Entaun brand sira neebe halo iha Baukau husi nuu kulit sai buat oin oin, ikus ita hateten Baukau nia brand mak nuu kulit,” Veneranda komenta.
Nia rekonhese, mezmu transformasaun nuu kulit ba produtu oin oin iha ona fiziku, maibe foin faze teste, tanba seidauk too faze finishing hodi bele faan iha merkadu lokal.
Nia fundamenta, bainhira prosesu sira lao diak too faze finishing sei la promove liu husi faan ba hotel no restorante sira iha Baukau laran, nunee osan sirkula iha Baukau .
“Se finishing diak ita faan fali ba hotel sira nee enves hotel sira nee ba sosa fali tapetes sira husi rai liur, diak liu sosa ita nia produtu lokal neebe nia kualidade mos la lakon ho sira neebe husi rai liur mai,” Veneranda promete.
(tom)
