DILI, STLTIMORLESTE.com – Xefe Misaun Rezidente dahukuk Vietname nian promete apoiu tomak ba dezenvolvimentu no Timor Leste nia integrasaun ba ASEAN.
Kestaun nee hatoo husi Enkarregadu Negosius Vietnam nian, Pham Binh Dam ba jornalista bainhira remata halo enkontru ho Prezidente Republika Jose Ramos Horta iha palasiu Prezidensial Nicolau Lobato, Bairo Pite, Kinta (23/04/2026) hatete, Vietname iha komitmentu apoiu Timor Leste nia adezaun Full ba membru ASEAN.
“Hau nia ksolok no onra boot, no hau nuudar Xefe Misaun Rezidente dahukuk Vietname neebe hetan fiar husi Governu Vietname nian, nafatin iha aspirasaun apoiu TL no relasaun kleur, povu no nasaun Timor,” dehan nia.
Iha biban nee nia mos kongratula Timor Leste tanba sai ona membru ASEAN no vietname iha kompromisu atu apoiu tomak ba Timor Leste nia integrasaun tomak iha 2029.
Prezidente Republika, simu Enkarregadu Negosius Vietnam nian, Pham Binh Dam, marka xegada Xefe Misaun rezidente dahuluk Vietnam nian iha Timor-Leste, neebe refleta marku importante ida iha hametin relasaun diplomatika entre nasaun rua nee.
Durante diskusaun nee, Pham Binh Dam afirma fali Vietnam nia solidariedade naruk ho Timor-Leste, neebe dezde tempu luta ba independensia. Nia hatoo Vietnam nia kompromisu atu apoia objetivu dezenvolvimentu nasional no integrazasaun tomak ba ASEAN. Espesifikamente, Vietnam promete atu serbisu hamutuk ho estadu-membru sira seluk atu asegura susesu ba Timor Leste nia Prezidénsia ASEAN iha tinan 2029.
Enkontru nee remata ho vizaun komun ba kooperasaun neebe luan liutan iha setor polítiku, diplomatiku no ekonomiku.
Pham Binh Dam enfatiza katak Embaixada Vietnam nian sei sai hanesan plataforma proativu ida ba koordenasaun ho ministeriu no instituisaun timor nian sira, ho objetivu atu lori rezultadu konkreta sira neebe fo benefísiu ba povu hosi nasaun rua nee no hametin estabilidade rejional.
(eme)
