DILI, STLTIMORLESTE.com — Jurista Timor oan, Sergio Dias Quintas konsidera katak violénsia doméstika kontinua akontese ho númeru aas, tanba iha mane balu ne’ebé konsidera feto la’ós hanesan parseiru moris, maibé hanesan objetu.
“Númeru violénsia doméstika kontinua sae, tanba dala barak mane sira la konsidera feto hanesan sira nia parseiru moris, maibé konsidera feto hanesan objetu deit,” dehan Jurista Sergio Dias Quintas ba STL iha Komoro, Kinta (28/08/2026).
Sergio hateten, situasaun hanesan ne’e dala barak akontese iha família sira ne’ebé iha nivel edukasaun ki’ik no kondisaun ekonomia vulnerável.
Nia subliña, Estadu, liuliu Governu, tenke foti medida prevensaun liu husi sensibilizasaun kontinua ba komunidade, atu ema sira komprende katak violénsia doméstika mak krime públiku. Ema ne’ebé hatene kona-ba krime ne’e bele hato’o keixa.
Nia mos esplika katak feto sira dala barak sai vítima tanba depende ekonomikamente ba mane. Bainhira feto husu osan ba nia parseiru no mane lakohi fó, situasaun ne’e bele hamosu konflitu ne’ebé ikus mai provoka violénsia doméstika.
Tanba ne’e, Sergio konsidera katak dalan ida atu reduz violénsia doméstika mak Estadu tenke hametin kapasidade ekonomia feto sira, atu sira bele iha independénsia ekonomia.
Iha sorin seluk, Akademiku UNTL, Sebastiao dos Santos, husu ba vítima violénsia atu labele tauk hato’o keixa.
“Se mak hasoru violénsia, labele tauk atu hato’o keixa, tanba lei iha atu regula aktu sira ne’e. Hato’o keixa hanesan mos dalan ida atu halo prevensaun iha futuru, hodi labele akontese tan,” dehan nia.
Sebastiao subliña katak feto no inan sira tenke moris livre husi violénsia, tanba aktu violénsia mak krime no bele afeta moris família.
Aleinde ne’e, Prezidente Tribunal Rekursu, Afonso Carmona, mensiona katak krime violénsia doméstika kontinua aas iha Tribunal sira. Nia espera katak desizaun sira ne’ebé Juiz foti iha prosesu julgamentu bele ajuda hamenus númeru krime violénsia doméstika.
(ter)
