DILI, STLTIMORLESTE.com – Antigu Deputadu husi Bankada Partidu Demokratika (PD) no Eis Membru Konselhu Estadu, Virgílio Hornai husu ba autoridade publiku sira iha Timor Leste atu banati tuir atitude husi governante sira iha nasaun seluk, neebe ho vontade rasik rejigna aan (demite an) bainhira sente komete violasaun ba valor etika publiku, iha sira nia asaun no komportamentu.
Iha nia komentariu, Hornai hatoo katak prinsípiu transparansia no akontabilidade publiku labele sai deit nuudar materia retorika ka koalia mamuk hodi manan spasu publiku, maibe tenke hatudu liuhusi asaun konkreta no konsistente.
“Autoridade publiku sira presiza banati-tuir lisaun husi governantes nasaun seluk, neebe sente viola valor etika publiku iha nia asaun no komportamentu hodi rejigna an voluntariu,” dehan Virgílio Hornai bainhira dada lia ho STL, iha Díli,” Kuarta nee (22/07/2026).
Eis Antigu Deputadu nee hatutan tan katak, sistema rekrutamentu politiku iha partidus sira presiza mudansa neebe mehi no ho visaun klaru.
Nia sublina importansia husi sistema kadernizasaun hodi hatur kualifikasaun pre-rekizitu sira ba figura sira neebe iha integridade aas, atu nunee bele rekupera fila fali konfiansa husi povu no publiku.
Iha parte seluk, Hornai mos fó avizu seriu kona-ba pratika nepotizmu no korrupsaun, iha laran partidaria neebe bele estraga futuru nasaun nian. Nia enfatiza katak, se deit “ema foer ho foer maka hakiak malu” iha laran, ikusmai Partidu, Nasaun, no Povu maka sei sai vítima no terus nafatin.
Komentariu nee hetan mos apoiu husi Observador Polítika, Romaldo de Oliveira , neebe hatete katak preokupasaun husi eis-deputadu nee refleta duni realidade polítika iha Timor-Leste, neebe kultura rejigna an husi kargu publiku seidauk sai husar-talun ba lider sira.
Tanba tuir nia, partidu polítiku sira tenke sai husi zona konfortu no hahu halo reformulasaun ba sistema rekrutamentu internu, hodi nunee labele prioritiza deit lealdade partidaria maibe tenke tau integridade no kualifikasaun nuudar kriteriu ho valor neebe aas liu.
Entretantu Akademista husi Universidade da Paz (UNPAZ), Jacinto Xavier, reforsa katak edukasaun polítika no konsiénsia etika iha institusaun staatal no partidaria sira labele sai deit hanesan papel mamuk.
Nia kestiona falha husi mekanismu kontrolu internu sira neebe dait ba pratika patronajen, no enkoraja sosiedade sivíl husu responsabilizasaun makaas liutan ba lider sira.
Tuir Xavier, maski presiza tempu atu hamosu mudansa kultural nee, pasu dahuluk tenke hahu husi vontade polítika lideransa sira nian, atu hatudu ezemplu diak no sai modelu ba jerasaun foun.
(car)
