DILI, STLTIMORLESTE.com – Primeiru Ministru Kay Rala Xanana Gusmão hatete, ema balun neebe hatete PM Xanana mak fo fiar ba Empreza Esperansa Timor Oan (ETO) halo distribui mina nee sala boot koalia arbiru.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato Bairo Pite, Kinta (23/04/2026).
“Ema balun ataka hau dehan hau mak fo ba ETO nee sala boot koalia arbiru. Problema bainhira funu tama, laos problema ita atu sosa, problema mak suplay, ema atu faan nee. Neebe iha problema boot iha fatin hotu-hotu, hetan impaktu kona-ba funu nee, neebe rai barak neebe faan nee kaer atu fo ba sira nia rain rasik. Ho ida nee mak iha tolu ka haat ida mak importa, mais sira seluk dehan ami atu ba sosa iha neebe tan. Inklui mos Pertamina neebe fofoun husu dehan o bele hatama araska, Pertamina iha neebe boot tebe-tebes. Enkuantu ita iha US$ 1 milhaun resin habitantes, ho kareta deit mos ita nia estrada sira nee lao labele, Indonezia US$ 160 miloens rai boot tan, neebe Pertamina mos dehan ami laiha,” katak PM Xanana.
Agora ETO mak dehan, komu nia importa husi Taewan mak nia dehan iha neeba nee ema neebe faan mai nee dehan, sira sei iha ida nee, nunee iha garante tiha, Timor bele hetan.
“Too hau simu mos Ministra ida husi Australia, ami koalia ba malu, hau dehan kona-ba problema mina, hau dehan karik ami agora buka took, ami sei asina akordu ida nunee asina rezolusaun ida atu sosa husi Taewan liu husi ETO. La fo osan hotu ba ETO, liu husi ETO tanba ita atu garante nee mak eletrisidade, tanba nee mak loron ida hau dehan, bainhira difisil tebe-tebes ona, kalan sei taka eletrisidade,” katak Xanana.
Xefe Governu hatete, bainhira labele ona tanba problema laos atu sosa, problema ema atu faan mai Timor Leste nee, neebe komu sira mak iha, sira nia vendedor mak iha, dehan governu dudu atu sosa lalais nee tanba afinal Australia mos ema nia aman kompana ida faan mai ETO nee dehan, hakarak sosa, sosa ona tanba husi Australia mos hakarak husu hela atu sosa.
“Tanba afinal Australia iha gas mak barak, mina ladun, ho ida nee mak sosa. Mais saida mak ita atu selu nee ba garantia neebe ita atu uza sentral eletrika. Restu atu faan iha nee, iha neeba, osan fila fali ba governu, neebe koalia, ita kritika malu. Hau atu esklarese deit tanba sai tiha problema hanesan nee,” dehan PM.
(eme)
