DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Governu liu husi Konselhu Ministru aprova ona proposta husi Visi Primeiru Ministru Kalbuadi Lay.
Primeiru Ministru Kay Rala Xanana Gusmão ba jornalista sira iha Palasiu Prezidensial Nicolau Lobato, Bairo Pite, Kinta nee (09/04/2026) hatete, informa ba Prezidente Republika katak iha Konselhu, Ministru Visi Primeiru Ministru Kalbuadi Lay aprezenta dezenhu 5 ou 8 hanesan nee, nunee Konselhu Ministru ida neebe iha partikularidade oin-oin hanesan lafaek, manu, kaza tradisional maibe Konselhu Ministru hotu hotu por unaminidade mak ondax.
Hanesan lema baibain hatete, hau tasi hau nia Timor, no Timor ilha ida tasi haleu, tanba nee Konselhu Ministru aprova ona.
Iha biban nee Primeiru Ministru hatete, nia ho Primeiru Ministru Malazia Anwar Ibrahim bainhira mai TL ho Primeiru Ministru asina katak Centro Convenções Dili (CCD) nee sei iha fatin neeba.
“Ami mos asina iha neeba antes tiha ona, nunee Visi Primeiru Ministru kontaktu ba kontaktu mai ema bele halo ona estudu ida oinsa mak ita bele aproveita rai oan iha neeba, komesa ona halo dezenhu, buat sira hotu mais ita boot sira mos sei lembra tanba atan oan hau katuas ona dala ruma haluha beibeik, mais imi sei joven imi la haluha ida, fulan hira liu ba Primeiru Ministru anwar haruka kompanhia Estatal ida ho nia oan mane ibrahin rasik mai iha nee tanba hakarak los fo apoiu ba ita iha preparasaun ba simeira ASEAN iha 2029,” dehan PM Xanana.
Primeiru Ministru hatete, sira informa ona ba kompanhia nee katak TL hanoin ida nee kleur ona labele hapara servisu hodi haree fali ba ida nee, maibe agradese tebes ba kooperasaun avontade hodi apoiu no ajuda Timor Leste.
“Agradese tebes ba imi nia kooperasaun, imi nia vontade atu ajuda ami atu prepara aan ba imi simeira 2029, nee mak ami mos temi, karik mak ami aprova dezenhu, buat sira nee hotu tanba falta tinan 2 deit se iha fatin balun imi bele partisipa halo ida nee no halo ida neeba, ami prontu, neebe horiseik aprova tiha arkitatura nee, agora Visi Primeiru Ministru ho Finansas horiseik koalia diskute ho kompanhia atu haree took kustu nee, oinsa buat sira nee hotu iha fulan ida nia laran sira sei prepara buat sira nee tanba 20 Maiu agora 24 anos ukun naan sei halo lansamentu iha neeba, dehan katak hahu iha nee sira atu servisu ona,” katak PM Xanana Xanana.
Kompanhia mos promete antes 20 Maiu 2028 prontu ona, iha tan dezenhu sira seluk iha akuariu ida neebe tama too tasi neeba para joven sira ba haree hodi sente nunee bele muda karakter neebe soe lixu arbiru nunee inan aman sira bainhira soe lixu arbiru sira fo hanoin tanba sira haree beleza tasi okos.
Nunee mos Konselhu Ministrus halao sorumutu iha Palasiu Governu, Dili, no aprova projetu arkitetoniku ba Sentru Konvensaun Dili foun, hafoin analize ba propostas modelu arkitetoniku neebe aprezenta husi Vise Primeiru Ministru no Ministru Koordenador Asuntus Ekonomikus, Francisco Kalbuadi Lay. Projetu estruturante ida nee ho objetivu atu sai uma-nain ba reuniaun sira ASEAN nian durante Timor Leste nia prezidensia iha tinan 2029, inklui simeira Xefe Estadu no Xefe Governu sira nian, no mos eventu ho dimensaun boot sira seluk.
Sentru konvensaun foun sei harii iha area portu tuan, iha Baía Díli nia sorin, no sei inklui edifísiu prinsipal ida ho sala konferensia, auditorius no pavillaun sira ba espozisaun, no mos area komplementar sira lazer no turizmu nian, inklui paseiu ida hodi lao iha kais nia sorin, akuariu ida no sentru entretenimentu no komersiu ida.
(eme)
