DILI, STLTIMORLESTE.com – Primeiru Ministru Kay Rala Xanana Gusmão ho Prezidente Republika Jose Ramos Horta hakfodak bainhira rona novidade tristeza membru Governu Ministru Ensinu Superior, Siensia no Kultura (MESSK), Jose Honorio da Costa Pereira Jeronimo hakotu iis, hodi fila hikas iha Nai nia kadunan Santo.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha palasiu Prezidensial Nicolau Lobato, Bairo Pite, Kinta (23/04/2026).
“Hau informa ba Prezidente Republika, Prezidente mos hakfodak, hau mos hakfodak, tanba iha hela notariadu ami haree problema sira lao oin nusa mak mosu mai dehan Ministru Ensinu Superior Siensia no Kultura mate tiha. Mate iha mortuariu HNGV, nia isin mutin uitoan, too haree ba metan hotu, hau ladun konese tiha. Neebe dehan, nia monu iha nia servisu fatin, agora lori tiha ba dehan, fuan,” dehan Primeiru Ministru Xanana Gusmao.
Nunee mos Prezidente Republika Jose Ramos Horta sente triste bainhira lakon membru Governu Ministru Ministru Ensinu Superior, Siensia no Kultura (MESSK), Jose Honorio da Costa Pereira Jeronimo neebe nain bolu hikas ona iha nain nia kadunan Santo.
Nunee mos Konsellu Ministrus aprova ona Rezolusaun Governu ida neebe hatoo ninia tristeza boot ba Ministru Ensinu Superior, Siensia no Kultura, Jose Honorio da Costa Pereira Jeronimo nia mate.
Governu hatoo sentida kondolensia sinsera ba familia enlutada no rekonese publikamente kontribuisaun boot neebe saudozu halo iha servisu ba Estadu no iha dezenvolvimentu ensinu superior iha Timor-Leste. Rezolusaun nee mos determina atu halo minutu silensiu ida iha instituisaun publika sira no ensinu superior hotu-hotu, iha data neebe sei determina.
Sidadaun Timoroan ho meritu rekonesidu, destaka ninia dedikasaun publika tanba ninia kompromisu ba dezenvolvimentu sistema ensinu superior, promosaun konesimentu no valorizasaun kapital umanu nasional, tantu nuudar membru Governu no molok nee iha Universidade Nacional Timor Lorosae.
Bainhira saudozu halao knaar governu nian, iha ninia servisu sempre bazeia ba padraun neebe aas kona-ba dedikasaun, kompetensia teknika no espiritu servisu publiku, no mos kontribui ona ba konsolidasaun politika publika iha area ensinu superior, siensia no inovasaun.
Ninia vizaun estratejika no kompromisu halo nia bele reforsa kualidade instituisaun ensinu superior sira, promove kooperasaun akademika internasional, no mos habelar oportunidade formasaun avansada ba sidadaun timoroan sira.
Ninia mate nuudar lakon ida ba Governu, ba komunidade akademika no sientifika, no mos ba povu Timoroan.
(eme)
