DILI, STLTIMORLESTE.com – Primeiru Ministru (PM), Kay Rala Xanana Gusmão ho Prezidente Republika (PR), Jose Ramos Horta kongratula no apresia ba povu Timor Leste (TL), tanba mantein pas iha selebra 20 de Maiu, Timor nia indepedensia ba dala 24.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (21/05/2026).
Iha hasoru malu nee Prezidente Republika husu Primeiru Ministru atu hatoo agradese no apresia ba Povu Timor leste neebe hatudu maturidade diak liu husi mantein pas iha selebrasaun 20 de Maiu.
“Prezidente husu ba hau atu agradese ba povu tomak liu liu ba joven sira tanba durante loron hira neebe ita halo selebrasaun la akontese buat ida, Prezidente kontente tebes nuudar Prezidente Republika nia husu dehan o labele haluha fo ninia obrigado apresu boot tebes ba joven sira ohin loron nee hatene garante Timor nia naran, liu liu tanba malae sira mai barak tebes buat hotu gosta hotu hotu apresia tanba ita hatene bebeik dehan katak iha 24 anos saida mak ita buka establese hametin mak pas establidade, no sira dehan los duni iha duni pas iha duni estabilidade,” dehan Primeiru Ministru.
Primeiru Ministru hatete, selebrasaun 20 de Maiu Timor Leste nia Indepedensia ba dala 24 fo oportunidade ba Timor oan atu halo refleksaun konaba saida mak halo ona, no saida mak seidauk halo no saida mak atu halo no hadia ba oin.
“Hau kontaktu ho estranjeiru sira neebe mai sira mos hatene sira dehan ami akompanha ami haree katak imi halo buat barak maibe seidauk halo buat hotu hotu foin dadauk hau hasoru embaixador husi Kanada nia lori kompanha bobot sira husi Kanada mai hakarak ajuda hotu hotu hakarak ajuda tanba tanba sai membru ASEAN nia mos mak foti hanesan foti ita nia naran ba rai barak barak hodi dehan ita Timor tanba rai foun ida iha asean nia laran,” katak nia.
Primeiru Ministru Xanana hatutan tan katak, Timor mos kontribui ba rai seluk iha ASEAN sira agora iha neeba.
Primeiru Ministru hatutan tan katak, kontente ho selebrasaun 20 Maiu Timor Leste nia aniversariu Indepedensia ba dala 24 nuudar tinan refleksaun nia, no buat ida neebe importante mak konsege hasai buat ida refleksaun konaba saida mak halo iha tinan 24 ukun aan nee.
“Problema boot mak nee konsege hasai buat ida refleksaun buat ida refleksaun konaba saida maki ta halo iha 24 anos ukun aan hodi sai hanesan lisaun ida para ita haree ita presiza vizaun, ita laiha vizaun mai tiha Governu halo arbiru tun tiha mai fali ida nee presiza vizaun vizaun liu liu atu fo valor ba heroi sira nia sakrifisiu no bele fo bele valor ba uku naan nee,” katak PM Xanana.
Xefe Governu hatete, objetivu husi heroi sira nia luta durante 24 anos hodi lori rai nee ba hetan ukun aan hodi hadia rai nee no hadia povu nia moris.
(eme)
