DILI, STLTIMORLESTE.com – Primeiru Ministru (PM), Kay Rala Xanana Gusmão husu joven iha Timor laran tomak atu hametin estabilidade no domin iha tempu Natal no tinan foun 2025, nunee prepara fuan nakonu ho domin hodi simu Kosok Oan Jesus.
Xefe Governu hatoo lia hirak nee liu husi nia diskursu iha serimonia abertura Festival Prezepiu no Feira Natal iha resintu Palasiu Prezidensial, Nicolau Lobito, Bairo Pite, Dili, Kinta (12/12/2024).
Aividade serimonia abertura Festival Prezepiu no Feira Natal tuir Xefe Governu hanesan fo omenajen ida ba inan aman sira neebe faan sasan, tanba natal ba povu, maske la konsege ba povu tomak, maibe sente katak biar imperior iha munisipiu sira haree ida nee husu Prezidente Republika tinan mai halo iha fatin hotu.
Tanba prezepiu neebe halo iha palasiu kapaas tebes, tanba prezepiu balun labarik sira mak halo hatudu sira nia kreatividade katak Timoroan laos baku malu deit, tuda malu deit, maibe hatene halo buat diak.
“Liu-liu iha epoka natal neebe sei hatutan ba fim do ano husu ba joven sira hotu atu kaer metin saida mak ita hotu desidi tiha ona, hametin estabilidade, hametin harmonia, hametin domin liu-liu agora iha Natal nia laran too ano novu,” katak PM, Xanana.
Iha biban nee, PR husu ba publiku ba sidadaun neebe mak hakarak ba vizita prezepiu neebe mak halo iha Palasiu Prezidensial ba ho sentimentu domin no harmonia, sentimentu unidade, sentimentu pas nia, nunee bele too iha 31 Dezembru bele haksolok hamutuk hodi simu tinan foun 2025.
Nunee mos Ministru Komersiu no Industria, Filipus Nino Pereira hatutan, atividade serimonia abertura Festival Prezepiu no Feira Natal nee natal ba povu no palasiu do povu.
“Orgulhu tebes ba ita nia eventu ida nee, eventu nee fo kontinuasaun no apresiasaun ba kreatividade ba matenek ba joven sira neebe demostra hodi hatudu prezepiu neebe furak husi material lokal no material reklizajen nia neebe transforma sai produtu artistiku ida,” katak Ministru.
Nia dehan, tama daudaun ona momentu Natal nia harame prezepiu natan nee ho domin ho pas ho esperansa ho asaun sosial no karitativa neebe mak halo hodi hametin nafatin esperansa ba nasaun nakonu ho esperansa hodi simu kosok oan nain Jesus Kristu.
(eme)
