DILI, STLTIMORLESTE.com – Primeiru Ministru (PM), Kay Rala Xanana Gusmão nomeia hikas eis Embaixadór Japaun iha Timor Leste (TL), Kitahara Iwao atu kontinua mandatu hanesan Konsúl Onorariu Timor Leste (TL) nian iha Japaun, neebe ninia mandatu besik atu termina iha fulan oin.
Tuir nota komunikadu neebe STL asesu husi media Gabinete Primeiru Ministru iha Sesta nee (07/02/2025) sita katak, Primeiru Ministru aprezenta ona kopia karta nomeasaun ba Embaixadór Kitahara iha ambitu jantar amizade neebe oferese husi atual Embaixador Japaun iha Timor Leste, Tetsuya Kimura iha nia rezidensia ofisial nuudar onra ida ba vizita Kitahara Iwao ho espoza.
Embaixador Kitahara hanesan belun boot Timor nian, tanba kontinua dedika aan hodi hametin relasaun entre Japaun ho Timor Leste.
Bainhira remata mandatu iha Timor Leste
Nuudar Embaixador Japaun, nia fila ba Japaun no estabelese Fundasaun Lorosae Nippon hodi enkoraza no promove inter-kambiu kultural no amizade entre povu Japaun ho povu Timor.
Governu Timor Leste nomeia hikas Embaixador Kitahara hodi kontinua servi hanesan Konsul Onorariu bazeia ba nia dedikasaun no servisu ba Timor.
Serimonia entrega kopia karta nomeasaun iha ambitu Jantar amizade nee, Primeiru Ministru (PM), Kay Rala Xanana Gusmão akompanha husi Xefe Gabinete Primeiru Ministru nian, Elizabeth Exposto.
(alb)
