DILI, STLTIMORLESTE.com – Primeiru Ministru (PM), Kay Rala Xanana Gusmão hatete, foin lalais Prezidente observa hela hospital iha Atambua halo atendimentu diak, tanba nee karik sidadaun Timoroan balu moras labele kura bele transfere ba Atambua duke ba Singapura no Malazia.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kinta (06/03/2025).
Primeiru Ministru dehan, foin lalais Prezidente Republika Jose Ramos Horta vizita ba hospital iha Atambua haree direita sira nia atendimentu kapaas tebes, tanba nee karik pasiente Timoroan balu neebe labele kura bele transfere ba Atambua hodi halo tratamentu duke ba halo tratamentu iha singapura, Malazia.
“Prezidente Republika mos dehan, foin daudaun liu husi Atambua, hau sei koalia ho Ministra Saude atu haree dehan iha tekniku kapas iha Atambua. Iha moras ruma neebe iha nee la konsege, haree esperiensia, laos deit ida nee, mais ema moras karik haruka ba Atambua osan oituan deit, duke haruka ba Singapura, Malazia, sira mai juta-juta tiha fali selu mos labele,” dehan PM Xanana.
iha enkontru nee Prezidente Republika Jose Ramos Horta fo hanoin ba Primeiru Ministru Xanana Gusmão atu haruka pasiente Timor Leste ba Hospital Atambua, Indonezia, tanba Hospital Atambua nia atendimentu diak no fasilidade diak.
Iha biban nee, Primeiru Ministru dehan, sei koalia ho Ministra Saude oinsa bele transfere ba Atambua ho kusta kiik, duke lori ba Singapura no Malazia, depois de tinan ida kusta osan milhaun ba milhaun.
Iha biban nee Primeiru Ministru, Kay Rala Xanana Gusmão informa ba Prezidente Republika katak, momentu ida nee Governu halao hela workshop, PM ba tiha Ermera ona, ba Lospalos, iha Dili rasik.
“Hasoru malu ho setor privadu ita nian bele kurije ona saida mak sira toman tiha ona, ka imi hakarak estraga, ka imi hakarak kafe imi la kuu mai monu iha nee imi husu kompensasaun, neebe hotu-hotu konkorda ona. Agora atu hahu loke tan estrada tanba ita nia rai nee, rai fraku tanba rai foun tebes-tebes neebe rai sira nee udan oituan mai estraga hotu, ida nee mak ita tenke loke, tanba lae ita la loke kamioneta sira todan mai iha nee hanehan monu estrada monu beibeik nee mak tenke loke husik tiha espasu boot ida. Hanesan iha Dili mos iha Delta Nova hasoru malu ho emprezariu sira hodi dehan ita tenke kurije saida mak ita toma ona karik halao iha tinan ida nee ita tenke kurije, tanba haree katak husi ADN karik, SNA karik, MOP karik uluk nee Kompanheiru neeba simu projetu lima, ida halo 5% deit, ida foin mak 15% mas simu tan, tanba osan tama husi kotuk nee mak avizu tiha ona,” katak PM Xanana.
Xefe Governu dehan, se mak husu osan fo hatene hasai tiha kedas, hodi bele dudu emprezariu sira bele iha kbiit, bele halao sira nia servisu, tanba atu dezenvolve ekonomia laos governu, mas setor privadu.
Tuir observasaun neebe mak STL hetan, foin lalais Prezidente Republika Jose Ramos Horta viajen ba Oekusi husi Atambua Prezidente Republika hamutuk ho Embaixador Indonezia ba Timor Leste, Okto Durinus Manik vizita mos Hospital RSUD Mgr Gabriel Manek SVD Atambua remata vizita kontinua viajen ba Oekusi hodi fahe nesesidade baziku ba komunidade sira.
(eme)
