DILI, STLTIMORLESTE.com – Primeiru Ministru (PM), Kay Rala Xanana Gusmao hatete, selebrasaun Timor Leste (TL) nia restaurasaun independensia ba dala 24 iha 20 Maiu, nuudar tempu refleksaun.
Primeiru Ministru Kay Rala Xanana Gusmao ba Jornalista iha Palasiu Prezidensial Nicolau Lobato, Bairo Pite, Kinta (14/05/2026) hatete, selebrasaun Timor Leste nia Restaurasaun Indepedensia ba dala 24 iha 20 maiu ho tema “Hamutuk ita sei harii Patria ida neebe justa, inklusiva no Rezilente liu tan, ida nee nuudar refleksaun ida.
“Informa ba Prezidente Republika, ami diskute uitoan kona-ba loron 20 Maiu nee ami nain rua konkorda katak, loloos selebra hanesan baibain, mais konkorda katak, loron 20 Maiu nee ita selebra tanba sai hanesan tempu reflesaun. Tanba ita halo funu tinan 24 terus atu hetan ukun aan, hetan tiha ona ukun aan, durante tinan 24 nee halo saida,” dehan Primeiru Ministru.
Primeiru Ministru hatete, ho ida nee mak laos atu festeja, halo festa mais momentu reflesaun dehan, tinan 24 ukun aan nee saida mak halo diak no saida mak halo aat, saida mak seidauk lao, saida mak tenke lao.
“Ita haree katak dezafiu sei barak. Dezafiu sei barak foin loron rua kotuk ba, imi hotu dala ruma hatene, loke iha Salaun Katedral ninian, asinatura, kontratu ho 51 empreza, laos empreza bobot, empreza Timor nian, feto lubuk ida, mane hodi hatama eletrisidade ba too aldeia. Iha tinan 2016, bainhira governu hakotu iha 38% populasaun seidauk hetan ahi eletrisidade. Ami tama fali iha Jullu 2023 38% nee nafatin hela deit seidauk hetan ahi eletrisidade, “ dehan PM Xanana.
Xefe Governu hatete Tinan kotuk suku hotu-hotu hetan tiha ona, agora Juñu nee sei asina tan lubuk ida, hein katak too Dezembru tinan ida nee laiha aldeia ida neebe laiha ahi eletrisidade.
“Hau temi tinan 24 ukun aan nee mak ita selebra nee nuudar tempu reflesaun tanba ukun aan laos hetan tiha Bandeira hasae, hatun. Laos kanta imperalismo, Maibe ukun aan fo oportunidade para povu bele moris diak liu horsehik, neebe estrada, bee, ahi eletrisidade, saude, edukasaun buat sira nee mak sei haree,” katak Xanana.
Tanba ida nee mak bainhira mai kaer governu laos atu hatama ema mai servisu hetan osan, mais tenke iha vizaun hodi oinsa mak ukun aan nee lao diak, sei povu hanesan moris ho kondisaun neebe diak liu ida nee mak objetu ukun aan nee.
Xanana hatete, uluk beiala sira 1975 barak liu mak la hatene hakerek, lee, maibe hakarak ukun aan, maibe hakarak ukun aan nee oin nusa dehan nia oportunidade Timor oan mak kaer rasik kuda talin hodi halo buat ruma bele moris diak.
“Tanba ida nee mak imi hotu hatene ona katak Governu ida nee komprimitidu atu dudu dezenvolvimentu ekonomiko hodi redus tiha importasaun tanba foin lao mai iha nee haree joven sira labarik kiik sira sai husi eskola mai fuma sigaru ida nee 25 centavos, 50 centavos, oituan oituan loron loron nee miloens dolar ba hotu rai liur, ho ida nee mak ita so bele lori rai nee ba dalan los no povu nee ba moris diak liu kuandu ita iha vizaun ida tanba nee mak ohin ami koalia tiha ona katak lolos ita kuandu halo festa boot 25 anos 50 anos maibe 24 nee lae maibe 24 nee tanba koresponde lolos kedas ho 24 anos rejistensia,” katak Xanana.
Iha biban nee Primeiru Ministru no Prezidente Republika Jose Ramos Horta husu joven sira atu mantein pas, labele provoka problema halo problema manan saida lamanan buat ida.
(eme)
