DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Timor Leste seidauk iha kapasidade atu kontrola didiak rikusoin iha tasi.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta nee (23/04/2026).
“Neebe ita seidauk iha kapasidade atu kontrola didiak ita nia tasi, nee mak horsehik mos ami koalia iha Konsellu Ministru hodi husu ba polisia atu forma ita nia polisia maritima nee bele kaer ro boboot. Tanba ba ona tasi boot neeba so ro boot, lae la aguenta, ondas boot tebe-tebes,” katak PM Xanana.
Primeiru Ministru hatete, bainhira sira prepara aan ona, Governu bele sosa ro ba patrolla nee ro boot uitoan sira bele kaer hodi kontrola rikusoin tasi hanesan ikan.
“Tanba ro sira nee ba, hasai hotu ikan nee sira hili ida diak atu faan, restu mate tiha ona soe fali ba tasi,” katak PM Xanana.
PM Xanana dehan, horsehik iha Konsellu Ministru koalia ona oinsa mak polisia bele forma ona pilotu kaer ro boot sira nee.
“Prepara tiha mak ita sosa ro, enkuantu ho Indonezia fronteira nee tomak, ita nia hotu ona atu halo tuir hau nia amiga boot liu iha Indonezia nia naran Susi, nia Ministra ro sira husi Vietname, Xina husi neebe tama iha neeba, nia ba hatun hotu,” katak PM Xanana.
Xefe Governu hatete dala ruma sosa uluk lai ro ida, forma lai timor oan nia ema kuandu bele ona lori roo boot Governu bele sosa hodi halo patrolamentu iha tasi.
Foin lalais Polisia Martima mos kaptura sidadaun Indonezia neebe mak halo peska illegal iha tasi Timor.
(eme)
