DILI, STLTIMORLESTE.com – Primeiru Ministru Kay (PM), Rala Xanana Gusmão hatete, transfere pasiente ba Atambua atu salva ema nia vida, tanba fasilidade iha neeba diak.
Xefe Governu dehan, atu transfere pasiente ba Atambua sei haree lai kondisaun ida neebe mak iha Hospital laiha mak lori ba, laos transfere hotu pasiente ba Atambua.
“Sai viral tanba ita boot mak hakerek dehan ba ona, balu dehan ita sai ba kabupaten ita sai suku, dala ruma ita hanoin katak ba Bali bele, ba Bali Siloan Jakarta bele, mais tanba Atambua iha kedas sorin be ita sai fali kabupaten Timor Kupang, problema salva ema, ita haree US$ 18 milhões husi Governu uluk nia foin mak atu selu, laos oituan, se US$ 18 milhões la haruka ba Malazia, Singapura, imi riku hotu, neebe karik iha fasilidade neebe kura buat ruma neebe ita seidauk iha nee nusa lae,” dehan Xefe Governu ba jornalista sira, bainhira remata halo enkontru ho Prezidente Republika, iha Palasiu Prezidensial Nicolau Lobato, Bairo Pite, Dili, Kinta (13/03/2025).
Primeiru Ministru dehan, iha ema balu mos deklara katak sente moe bainhira haruka pasiente Timoroan ba fali kabupaten Atambua, ida nee Primeiru Ministru rekonhese no koalia ona ba Prezidente Republika katak, iha VII Governu no VIII Governu nee hospital funsiona ho diak kapas IX Governu mak estraga fali.
“Laos katak atu haruka hotu ba Atambua, balu dehan haruka ba halo ita moe, atu mate, tanba sa mak haruka fali ba Atambua, sim hau rekonhese hau dehan tiha ona ba Prezidente ohin, hau rekonhese katak iha VII Governu hospital funsiona atu mate VIII Governu aitonka nee mos buat hotu diak, IX Governu taka tiha mak estraga tiha hotu nee,” katak PM, Xanana.
Primeiru Ministru dehan, se transfere ba Atambua sei haree kondisaun, laos haruka hotu ba hodi taka tiha HNGV.
“Laos atu halo transfere, hau nunka haree ida nee, atu ba haree kondisoens iha neeba karik iha moras ruma neebe ita presiza ita haruka ba laos atu haruka hotu taka tiha Hospital Nasional Guido Valadares, kuandu rona buka aprende,” katak nia.
Primeiru Ministru dehan, Kinta feira semana kotuk dehan tiha ona Prezidente liu husi Atambua observa Hospital Atambua nia fasilidade diak, tanba nee mak sei haruka Ministra Saude hodi haree no observa.
Nunee mos kona-ba Hospital Lahane oras nee Prezidente Republika mos koalia ona ho United Emirates ema mai no ba ona haree. No sira sei haree ekipamentu no tekniku saida hodi ajuda tan mediku Timoroan atu aprofisua, nee laos milagre, ohin haree ohin realiza kedas.
(eme)
