AMBENO, STLTIMORLESTE.com – Xefe Suku Bobocase, Thomas Nesi ho Xefe Suku Kutete, Jose Antonio Bana, agradese ba Governu Autoridade Rejiaun Administrtiva Espesial Oecusse-Ambeno (RAEOA) liu husi Diresaun Rejional Infraestrutura neebe normaliza ona estrada neebe kotu iha Bairru Sikone, liga ba Suku Kutete no Bairru Nun-Ana ho Postu Unidade Patrolamentu Fronteira (UPF) iha Nun Ana.
“Hau nuudar Xefe Suku Bobocase, Postu Administrativu Pante Makassar, hatoo agradesimentu wain ba Governu Autoridade RAEOA lideradu husi Regio da Cruz Salu nuudar Prezidente Autoridade RAEOA hamutuk ho Diretor Rejional Infraestrutura, Remigio Nuno Sila neebe oriente ona ekipa pezadu husi Institutu Gestaun Ekipamentus (IGE), normaliza ona Estrada neebe kotu iha Bairru Sikone kauza husi rai monu,” dehan nia.
Nia haktuir tan katak, Estrada neebe kotu iha Bairru Sikone, Aldeia Faotbijae, Suku Bobokase, durante nee fo impaktu ba movimentu transporte publiku, liu-liu povu iha Suku Kutete no Nipane, Bairru Nun Ana, iha neeba iha Postu UPF ida iha neeba, sira nia movimentu labele lao tanba rai monu, maibe dadaun nee sente kontente tanba kuaze semana ida resin ona, povu komesa halo movimentu ona ho diak tanba intervensaun husi Diresaun Rejional Infraestrutura RAEOA.
Iha biban nee, Xefe Suku Kutete, Jose Antonio Bana mos hatoo agradese ba Governu Autoridade RAEOA neebe sempre tau matan ba preokupasaun povu iha koalker situasaun saida deit maka povu infrenta, realidade durante nee Estrada kotu kuaze fulan 2, governu komesa normaliza ona.
“Hau lori povu Kutete no Nipane Bairru Nun Ana, hatoo agradese no obrigado wain ba Governu Autoridade RAEOA neebe normaliza ona Estrada refere no dadaun movimentu transporte publiku ba Kutete no Nun Ana komesa diak ona,” dehan nia.
Iha fatin ketak, Domingos Elu nudar Povu Kutete mos agradese ba governu tanba sira nia atividades movimentu lori produtu lokal hanesan fehok, modo, aifuan advokat no seluk-seluk tan, bele moviliza ona ho transporte publiku hanesan angguna lori ba faan ona iha merkadu Nunbei ho merkadu Maumate.
“Durante nee ami nia movimentu transporte araska, sorte foin lalais nee rai halai, kareta angguna ida iha Bairru Kutete maka transfere pasajerus no produtu husi Kutete no Nun Ana ba merkadu maibe para deit iha Estrada aat maka foin trafere ba kareta seluk husi merkadu Maumate no Nunbei maka fasilita ami, selae ami hulan deit,” dehan nia.
Iha biban nee, nia husu ba governu atu fo indiminizasaun ba uma kain rua iha Bairru Sikone, atu nunee muda Estrada husi sira nia uma, atu nunee iha tempu udan karik labele impede movimentu trasporte tanba rai halai.
(jos)
