BAUKAU, STLTIMORLESTE.com – Xefe Suku Triloka, Reinaldo Nicolao da Silva konsidera Deputadu Virgilio Pereira hatoo deklarasaun falsu iha Parlamentu Nasional (PN) liu husi plenaria Segunda feira nee.
Iha sesaun plenaria loron 09 Junhu nee, Deputadu Bankada Partidu CNRT, Virgilio Pereira deklara, tuir lo-loos Intitutu Gestaun Ekipamentus (IGE) ateru rai mutin estrada diresaun ba eskola sekundaria foun Lequi-Loiuatu iha Suku Triloka la too semana rua remata ona, maibe seidauk remata, tanba maioria kondutor sira tula rai mutin laos ba ateru deit estrada, maibe faan fali ba komunidade sira husi US$ 10.00 too US$ 15.00 neebe halo komunidade lamentavel no manda fotografia ba deputadu refere.
“Hau rekomenda ba deputadu labele politiza buat sira nee atu manan buat hotu, maibe presiza tuun iha terenu para adverse kontrola sobre nesesidade povu nian, neebe hau dehan informasaun fo sai falsu, tanba hau nuudar xefe suku seidauk simu informasaun,” hateten Xefe Suku Triloka Reinaldo ba STL iha Triloka, Tersa (10/06/2025).
Xefe Suku Triloka nee relata, Autoridade Suku submete pedidu ba IGE atu reabilita estrada diresaun ba Eskola Sekundariu Lequi-Loiuatu iha Aldeia Makadai hamutuk kilometru tolu inklui kilometru ida ba Aubaka.
Husi kilometru haat neebe ekipa IGE halo reabilitasaun liu husi ateru rai mutin neebe iha parte balun konsege normaliza ona no parte balun seidauk, tanba ekipa IGE sei atende hela preokupasaun husi Suku balun neebe mos presiza tulun, maibe sei kontinua fali iha loron 15 Junhu nee hodi finiliza reabilitasaun refere.
“IGE kuandu mai halo atividade iha Triloka liu husi pedidu Suku mak submete, maibe durante nee hau seidauk simu informasaun IGE faan rai, IGE instituisaun Estadu neebe mai atu responde nesesidade komun nian, maibe dehan mai fali iha Triloka halo kompra rai mutin nian, Xefe Suku seidauk hatene,” katak Reinaldo.
Nunee relasiona deklarasaun Deputadu Virgilio Pereira neebe fo sai liu husi reuniaun Plenaria iha Parlamentu Nasional kona-ba IGE servisu tarde no kondutor faan rai mutin ba komunidade sira nee laloos, tanba Suku la simu informasaun, maibe prezensa IGE apoiu komunidade tuir pedidu neebe Autoridade Suku submete kona-ba ateru rai mutin ba estrada.
Durante observasaun STL nian iha terenu nota katak, estrada diresaun ba eskola sekundaria Lequi-Loiuatu ekipa IGE halo ona limpeza no ateru ona parte balun enkuantu parte balun seidauk halo ateru neebe dadaun ekipamentus pezadu ida para hela iha estrada refere.
(tom)
