DILI, STLTIMORLESTE.com – Ministeriu Solidariedade Sosial no Inkluzaun (MSSI) liu husi Instituisaun Nasional Seguransa Sosial (INSS) lansa sistema online modul kontribuisaun ba seguransa sosial, ho objetivu atu hafasil empregador no trabalhador sira nia kontribuisaun iha seguransa sosial ho efetivu no lalais.
“Ohin IX Governu Konstitusional liu husi INSS neebe tutela iha MSSI marka tan pasu ida iha jornada atendimentu publiku ba Seguransa Sosial hodi lansa aplikasaun sistema kontribuisaun Seguransa Sosial liu husi modul online, aplikasaun modul kontribuisaun ho sistema online nee ho objetivu xavi atu hakbesik no hafasil setor publiku no privadu ho sistema kontribuisaun regular trabalhador sira nian ho efetivu no lalais,” hatete Ministra Solidariedade Sosial no Inkluzaun (MSSI), Veronica das Dores liu husi diskursu iha ambitu lansa sistema seguransa sosial iha Salaun Mahaoka, Tersa nee (5/08/2025).
Governante nee hatete, aplikasaun Modul Kontribuisaun sistema seguransa sosial online nee sei kontribui ba redusaun tempu ba empregador no trabalhador sira hodi visita ba Edifisiu INSS regularmente, wainhira presiza halo reajustamentu ba dadus trabalhador sira.
Nia dehan, ba empregador sira iha trabalhador foun ka kontratu foun ou wainhira trabalhador balun termina ona kontratu servisu, foti feria do materinadade ka parternidade, ekipa rekursus umanu husi empregador sira bele jere informasaun sira no halo update ba estatus trabalhador sira nee hotu liu husi sistema online deit no la presiza tenke mai edifisiu INSS hodi halo update ba dadus sira nee.
Tanba sistema ida nee mos inklui Submisaun Deklarasaun Remunerasaun ka tabela salarial, hodi asesu ba guia de pagamentu ba banku no submete fila fali resivu pagamentu sira nee ba INSS.
Ministra hatete, aleinde ida nee ba trabalhador sira neebe mak hakarak halo kontribuisaun adisional hosi sira nia salariu ba seguransa sosial (Kontribuisaun neebe fora husi total 10% neebeiha) ekipa rekursu umanu sira, bele fasilita atu kontribuisaun adisional bele submete mos ba INSS bazeia ba Autorizasaun hosi trabalhador refere, tanba Kontribuisaun adisional ida nee, baibain ita bolu kontribuisaun fakultativa ba sistema seguransa sosial.
Nunee hahu ohin ba oin servisu hirak neebe mensiona iha leten bele submete liu husi sistema aplikasaun online ida nee, wainhira iha prosesu utilizasaun Sistema online ida nee mak ita boot sira hasoru problema karik, hau husu empregador sira atu komunika nafatin ho ekipa INSS hodi buka solusaun no responde ba difikuldade sira neebe hasoru.
“Hau mos apela ba ekipa INSS favor atende empregador sira hotu ho diak, ho maneira profisional, utiliza tempu ho diak, se bele problema sira nee bele rezolve ohin, ohin tenke rezolve kedas. Sistema nee nia objetivu atu hafasil Submisaun dadus, prosesu pagamentu ba kontribuisaun sira,” hatete nia.
Iha fatin hanesan, Prezidente INSS, Arlindo Pinto hatete, MSSI ho INSS konsege esforsu iha tinan 2023 too 2025 hodi hadia nafatin atendementu prestasaun servisu ba publiku sira liu husi dezenvolvimentu feramenta dizitalizaun ba sistema seguransa sosial Liu husi programa ensensial siira mak hanesan tuir mai, muda ona sistema mekanismu ba pagamnetu idozus no ba Ema ho Difiseinsia, lansa ona sistema portal seguransa Sosial, lansa sistema mobile App seguransa sosial ba trabalhador sira daudaun nee publiku sira asesu ona.
“Ohin ita kontinua halo lansamentu ba sistema online ba modelu kontribuisaun seguransa sosial,” hatete nian.
Nia haktuir, dezenvolve ona sistema finanseiru sistema internal ba seguransa sosial, dezenvolve ona sistema online ba prestasaun sosial neebe espera tinan ikus 2025 bele halo ona lansamentu, tanba nee iha planu ho parseiru OIT atu dezenvolve sistema GRP KA Free balance seguransa sosial Iha tempu oin mai.
Partisipa iha serimonia lansamentu sistema seguransa sosial Modolu kontribuisaun husi, Ministru Justisa, Vice MAE, Sekretariu Estadu Kooperativas (SECoop), Sekretariu Estadu Florestas (SEF), AIFAESA, PNTL, Empreza nomos parseiru sira.
(joa)
