DILI, STLTIMORLESTE.com – Prezidente Republika (PR), Jose Ramos Horta husu Polisia Nasional Timor Leste (PNTL) halo rekrutamentu ba membru PNTL tenke imparsial no presiza rekruta feto barak.
Prezidente Republika Jose Ramos Horta hatoo kestaun nee ba jornalista sira iha Embaixada Portugal, Kuarta (06/08/2025) husu Komando PNTL halo rekrutamentu tenke imparsial no tenke rekruta feto barak.
“Tenke imparsial no tenke buka rekruta feto barak liu tan, tanba Ministeriu Interior, Komando Polisia koalia beibeik kona-ba forum ruma konferensia ruma sira mos tenke jeneru barak los maibe kuandu too rekrutamentu ita lahare jeneru, nee duni hau sei haree feto hira mak sira rekruta persentajen hira,” dehan PR Horta.
Prezidente Republika hatete, se bainhira rekrutamentu ba membru Polisia Nasional Timor Leste mak numeru feto menus liu kompara mane, iha inagurasaun ou posse ruma atividade PNTL nia Prezidente deside lamarka prezensa.
“Se hau haree laiha liu feto feto oituan liu deit sira halo inagurasaun hau nein marka prezensa,” katak Prezidente Republika.
Nunee mos Visi Ministra Negosiu Estranjeiru ba ASEAN Milena Rangel hatete feto Timor Leste barak mak iha potensial atu bele hetan oportunidade atu serbisu iha area neebe deit nomos iha rekrutamentu PNTL.
“Hau fiar katak ita iha feto sira neebe bele mos prense kargu sira neebe ke feto disponivel kontinua fo korajen ba maluk feto sira bele aplika iha kargu, laos ba mane deit maibe feto sira mos bele ezerse funsaun ida neebe diak iha PNTL,” hakotu Visi Ministra.
Nia mos enkoraja feto sira hotu atu bele kompete, tanba oras nee dadaun feto barak mos iha potensial hodi bele halao serbisu iha neebe deit laos mane mesak mak iha kapasidade.
(eme)
