BAUCAU, STLTIMORLESTE.com – Servisu Munisipál Edukasaun Baucau apela ba estudante sira husi pré-eskolár to’o ensinu sekundáriu jerál no tékniku-vokasionál atu aproveita períodu suspensaun aula prezensiál durante loron tolu estuda iha uma.
Diretór Servisu Munisípal Edukasaun Baucau, Afonso dos Santos da Costa esplika, suspensaun aula prezensiál durante loron tolu ne’e hahú husi loron 15 to’o 17 Outubru 2026 bazeia ba orientasaun husi Ministériu Edukasaun.
Durante períodu ne’e, manorin sira fó Sevisu ba Uma (SBU) ba estudante sira atu kontinua aprende maski la tuir prosesu aprendizajen iha sala aula hanesan baibain, maibé nafatin iha oportunidade atu dezenvolve sira-nia koñesimentu.
“Loron tolu ne’e tuir orientasaun husi Ministériu atu labarik sira hela iha uma, no profesór sira mós fó hela serbisu ka traballu ba uma atu labarik sira labele hetan impaktu husi situasaun ne’ebé akontese agora dadaun ne’e,” Afonso dehan ba jornalista sira iha nia kna’ar-fatin, Vila Nova, Baucau, Kinta (15/10/2026).
Enkuantu suspensaun aula prezensiál ne’e akontese tanba poluisaun ar ne’ebé relata katak kauza husi inséndiu iha Kalimantan no Papua, Indonézia, ne’ebé fó impaktu mós ba Timor-Leste. Tanba ne’e, estudante sira presiza mantein kuidadu ba saúde no uza tempu iha uma ho atividade aprendizajen ne’ebé produtivu.
Afonso husu inan-aman sira atu kontinua fó apoiu no akompañamentu ba oan sira durante períodu suspensaun aula prezensiál, hodi asegura katak sira uza tempu ho di’ak, halo servisu eskolar no kontinua estuda iha uma.
Nia enfatiza katak kolaborasaun entre inan-aman no estudante importante tebes atu mantein disiplina iha aprendizajen, maski prosesu edukasaun temporariamente la hala’o iha sala aula.
“Estudante sira hela iha uma, inan-aman sira kontrola atu sira estuda iha uma laran. Labele pasiar tun-sa’e, tanba nia impaktu la di’ak ba ita-nia saúde,” Afonso akresenta.
SME Baucau enkoraja estudante sira atu la haree períodu suspensaun aula hanesan tempu atu para aprende, maibé oportunidade atu lee livru, halo servisu eskolar ne’ebé manorin sira fó, no reforsa koñesimentu ne’ebé hetan ona iha eskola.
(tom)
