DILI, STLTIMORLESTE.com – Visi Ministra Negosiu Estranjeiru ba ASEAN, Milena Rangel hatete, Timor Leste nia preparasaun ba adezaun ASEAN kuaze too ona final.
Visi Ministra Negosiu Estranjeiru ba ASEAN, Milena Rangel hatoo kestaun nee ba jornalista sira iha Embaixada Portugal, Kuarta (06/08/2025) hatete, Timor Leste nia preparasaun adezaun ba ASEAN kuaze too ona final.
“Hakarak hatete katak ita nia prosesu andamentu lao aselera los foin dadaun Segunda feira hotu hotu akompanha karik iha Konselhu Ministru estraordinariu neebe Primeiru Ministru lidera iha neeba ita aprova rezulusaun proposta rezolusaun ba Parlamentu Nasional rua deklarasaun ba ita nia adezaun ASEAN no ida fali ita nia adezaun ba karta ASEAN nee hanesan dokumentus prinsipal rua neebe determina ita nia adezaun, ita nia prosesu nee kuaze too ona final, tuir mai iha semana hira mai tan ita sei lori fila fali ba konsellu Ministru depois iha akordu lori ba Parlamentu Nasional iha instrumentu legais balun neebe ke defende ba karakter oinsa, balun neebe karakter signifikada aprova iha nivel konsellu Ministru ida fali ho karakter solene tenke lori ba ratifika iha parlamentu Nasional,” katak Visi Ministra Negosiu Estranjeiru.
Visi Ministra hatete, buat sira nee hotu prontu hotu ona presiza deit halo ajendamentu depois hodi ba ratifikasaun, premeiru hetan lai proposta rezolusaun Governu aprova tiha depois lori ba parlamentu nasional halo ratifikasaun.
Nia hatete, haree ba kalendariu indikativu neebe iha Timor Leste bele finaliza hotu ona iha fim de setembru no prosesu legal sira nee bele finaliza nunee too outubru asina akordo depois Timor Leste tama ona membru ASEAN.
Iha biban nee Prezidente Republika Jose Ramos Horta hatoo kongratulasaun ba Governu nia esforsu makaas nunee Timor Leste bele adere ba membru ASEAN Full iha fulan outubru tinan nee.
“Preparasaun lao diak los hau agradese kongratula ba Primeiru Ministru Xanana ho ekipa tomak ba Visi Ministru Negosiu Estranjeiru ba ASEAN maibe nee buat intersektoral Ministeriu hotu hotu kolabora servisu makaas portantu prosesu lao diak los,” katak Prezidente Republika.
Prezidente Republika hatoo kongratula ba Governu liu liu Primeiru Ministru Kay Rala Xanana Gusmão ho nia ekipa neebe esforsu makaas lori Timor Leste bele adere iha asean iha fulan Outubru.
(eme)
