DILI, STLTIMORLESTE.com – Prezidente Republika (PR), Jose Ramos Horta hatoo benvindu ba partisipante hotu neebe mak partisipa iha eventu Konferensia Ekonomika no Emprezarial Timor Leste (TL) – Australia 2025 ba daruak.
Iha biban nee Prezidente Republika Jose Ramos Horta liu husi Diskursu iha salaun Multiuzu Bebora, Kuarta kalan (06/08/2025) hatete, ho laran haksolok hatoo benvindu ba partisipante hotu neebe halibur hamutuk iha Konferensia Ekonomika no Emprezarial Timor Leste –Australia 2025 ba daruak.
“Ho ksolok boot mak hau fo benvindu ba ema hotu iha Konferensia Ekonomika no Emprezarial Timor Leste -.Australia ba daruak. Haksolok loos loke eventu importante boot ida-nee iha distintu konvidadu sira nia prezensa, partikularmente Primeiru Ministru Xanana Gusmão, membru Governu no Parlamentu, no distintu reprezentante sira husi Australia no nasaun sira seluk. Ami partilha kompromisu hodi hametin parseria entre Timor-Leste no Australia liu hosi kooperasaun ekonomika ida neebe signifikativa,” katak Prezidente Republika.
Prezidente Republika hatoo agradese ba Governu Timor.Leste no Australia, Kamara Komersiu no Industria Timor Leste no Konferensia Ekonomika no Emprezarial Timor Leste/Australia tanba organiza, ba dala rua, enkontru ida nee.
“Ami hein katak eventu ida.nee sei sai hanesan marku anual ida iha ita nia relasaun bilateral sira. Konferensia Ekonomika no Emprezarial Timor Leste – Australia 2025 laos deit konferensia ida ida nee hanesan ponte ida entre ita-nia nasaun rua. Hodi hasoru malu iha-nee, ita hametin ita-nia amizade, aprofunda ita nia kooperasaun no harii futuru ida neebe komun ba kreximentu no dezenvolvimentu ekonomiku,” katak PR Horta.
Xefe Estadu dehan, Timor Leste tama daudaun ba faze foun ida ba nia dezenvolvimentu. TL iha kompromisu renovadu ba diversifikasaun ekonomika no integrasaun rejional, prepara nasaun atu sai ator kompetitivu iha Sudeste Aziatiku.
“Ami.nia progresu ba adezaun ba ASEAN, neebe marka ona ba Outubru 2025, depoisde adezaun ba OMK iha 2024, reflete vizaun ida-nee no loke orizonte foun ba komersiu, investimentu no inovasaun. Ami investe ativamente iha setor xave sira ho potensial aas agrikultura, turizmu, indústria transformadora no rekursu natural sira. Iha tempu hanesan, ami implementa hela reforma sira hodi halo ambiente negosiu iha Timor Leste sai transparente, efisiente no atrativu liu ba investidor sira.
Partisipante neebe partisipa iha eventu konferensia nee mak Primeiru Ministru Xanana Gusmão, Dra. Anne Aly, Ministra ba Dezenvolvimentu Internasional no Ministra ba Empreza Kiik sira Australia nian, Embaixadora Caitlin Wilson, nomos Nicholas Moore, Australia nia Enviadu Espesial ba Sudeste Aziatiku, mebru Governu, membru Parlamentu, Membru Korpu Diplomatiku sira, Reprezentante emprezarial sira husi Australia no Timor Leste, parseiru dezenvolvimentu sira no delegadu sira Konferensia nian.
(eme)
