DILI, STLTIMORLESTE.com – Ministru Justisa (MJ), Sergio Hornai hatete, fatin neebe lokaliza iha Tasi Tolu tuir planu sei harii estadiun iha neeba, maibe informasaun mai husi tekniku sira katak, fatin neeba pertense ba dominiu privadu estadu nian.
“Hanoin balu neebe maka sira fo mai iha hau, hodi dehan nee pertense ba dominiu privadu Estadu,” dehan Ministru Justisa ba kornalista sira iha Kaikoli, Dili, Kinta (04/09/2025).
Iha fatin ketak, Komunidade Mateus Dos Santos dehan, planu Governu nian atu hari estadiun iha Tasi Tolu ida nee diak, maibe tenke respeita mos fatin sagradu neebe iha.
“Hau hanoin hari estadiun iha Tasi Tolu nee diak, maibe oinsa maka tau atensaun mos ba fatin Sagradu neebe iha, liu liu fatin neebe antes nee Amo Papa mai halo missa ona,” dehan nia.
Nia dehan, Estadu atu hari fatin nee sai hanesan estadiun ida, husu atu koopera nafatin ho Igreja liu liu esplika kona-ba razaun hari fatin nee iha neeba, atu labele hamosu duvidas iha sosiedade nia leet.
Entretantu, Governu Timor Leste liuhusi reu niaun Konsehlu Ministru, aprova ona proposta Federasaun Futebol Timor Leste (FFTL) nian, neebe atu halo reabilitasaun ba estadiu Municipal Dili no halo tan konstrusaun foun ba Estadiu ho kampu futsal indoor padraun internasional iha Tasi-Tolu, Dili.
Proposta nee hetan aprovasaun hafoin Prezidente FFTL, Nilton Gusmão dos Santos, Sekretariu Jeral FFTL, José Adilson Ribeiro ho ekipa aprezenta iha reuniaun Konsellu Ministru, neebe lidera direita husi Primeiru Ministru, Xanana Gusmão, iha loron 04 Junhu 2025.
Jornalista: Terezinha De Deus
Editora: Carme Ximenes
