FILIPINA, STLTIMORLESTE.com – Adujuntu Sekretáriu-Jerál no Portavós ba Asuntu ASEAN 2026 iha Filipina, Dominic Xavier Imperial, konfirma katak relasaun ASEAN no Estadus Unidus sei sai ajenda importante iha enkontru espesiál.
Nia hateten katak, enkontru espesiál ASEAN no Estadus Unidus (ASEAN–US Special Summit) sei revee relasaun entre parte rua, inklui komérsiu, investimentu, edukasaun no teknolojia.
Nia hato’o deklarasaun ne’e bainhira responde pergunta jornalista kona-ba espetativa prinsipál husi partisipasaun Prezidente EUA, Donald Trump, iha Simeira ASEAN.
“Enkontru espesiál ne’e sei revee relasaun ASEAN no Estadus Unidus, inklui tópiku no asuntu oioin ne’ebé tama iha relasaun abrangente entre parte rua,” hatete Adujuntu Sekretáriu-Jerál no Portavós ba Asuntu ASEAN 2026 iha Filipina, Dominic Xavier Imperial liu husi media brifing iha Media Center Filipina, Sesta (13/11/2026).
Nia esplika katak, asuntu hirak-ne’e sei tama duni iha ajenda diskusaun durante enkontru espesiál ne’e.
Nia informa kona-ba rezultadu espesífiku, Imperial husu atu hein konkluzaun husi simeira, ne’ebé sei aprezenta iha dokumentu ofisiál.
Nia deklara, dokumentu ne’e sei lista desizaun hotu-hotu ne’ebé líder sira foti durante enkontru ASEAN no Estadus Unidus.
(eme)
